12 жніўня, Позірк. У першай палове 2026 года ў Мінску здзейснена 108 злачынстваў, звязаных з гвалтам у сям’і, паведамляе Генеральная пракуратура са спасылкай на пракуратуру сталіцы.
Пацярпела 94 чалавекі, у тым ліку сем ва ўзросце старэйшым за 70 гадоў і сем непаўналетніх. Большасць пацярпелых (70) жанчыны.
У абсалютнай большасці выпадкаў злачынствы здзейсненыя асобамі ў нецвярозым стане. Амаль 80% злачынстваў аднесена да катэгорыі крымінальных спраў прыватнага або прыватна-публічнага абвінавачання (наўмыснае прычыненне лёгкага або менш цяжкага цялеснага пашкоджання, катаванне, пагроза забойствам, прычыненнем цяжкага цялеснага пашкоджання або знішчэннем маёмасці). Такія справы узбуджаюцца паводле заявы пацярпелага або яго законнага прадстаўніка.
Пракуратура адзначае, што ў шэрагу выпадкаў пацярпелыя ад сямейнага гвалту адмаўляюцца ад прыцягнення вінаватага да крымінальнай адказнасці з жалю, страху, а таксама з прычыны фінансавай залежнасці.
У некаторых такіх выпадках пры адсутнасці заявы пацярпелай асобы справы ўзбуджаюць пракуроры і накіроўваюць для папярэдняга следства. За 6 месяцаў 2026 года пракуроры раёнаў Мінска распачалі 90 крымінальных спраў у сферы хатняга гвалту. Згодна з законам, такім чынам узбуджаныя справы не могуць быць спыненыя ў выніку прымірэння.
Напрыклад, пракуратура Савецкага раёна Мінска па выніках вывучэння матэрыялаў праверкі раённага УУС распачала крымінальную справу ў дачыненні да раней судзімага 51-гадовага жыхара сталіцы па факце катавання, здзейсненага ў дачыненні да асобы, якая знаходзіцца ў залежным становішчы.
Устаноўлена, што мужчына са жніўня па снежань 2025 года сістэматычна збіваў жонку, якая мае інваліднасць III групы. Жанчына знаходзіцца ў залежным ад мужа становішчы, не магла самастойна абараняць свае правы і законныя інтарэсы, адзначае пракуратура.
Раённы суд прызнаў мужчыну вінаватым паводле ч. 2 арт. 154 Крымінальнага кодэкса (катаванне) і пазбаўлены волі на 2,5 года з адбываннем пакарання ў папраўчай калоніі ва ўмовах строгага рэжыму і штрафам у даход дзяржавы ў суме 1.574,78 рубля. Прысуд суда набыў моц.
Штогод у Беларусі фіксуецца каля 80 тыс. паведамленняў аб хатнім гвалце, звычайна гвалтаўнікамі з’яўляюцца мужчыны.
У верасні 2021 года Вярхоўны суд ліквідаваў міжнароднае грамадскае аб’яднанне “Гендарныя перспектывы“, якое займалася праблемамі хатняга гвалту і палавой дыскрымінацыі.
9 сакавіка 2022 года Мінскі гарадскі суд ліквідаваў грамадскае аб’яднанне “Радзіслава“, што дапамагала жанчынам, якія пацярпелі ад гвалту.
У Беларусі няма закона аб супрацьдзеянні хатняму гвалту. Праект адпаведнага дакумента распрацоўваўся некалькі разоў. У кастрычніку 2018 года чарговы варыянт рэзка раскрытыкаваў Аляксандр Лукашэнка, назваўшы яго “дурасцю, узятай найперш з Захаду“.
Дзяржаўныя СМІ замацоўваюць у прапагандысцкіх матэрыялах гендарную няроўнасць як сацыяльную норму.
