НАК, Мінспорту, іншыя дзяржорганы і СМІ праігнаравалі смерць Мікалая Казекі, які прынёс сусветную славу беларускаму фрыстайлу

12 жніўня, Позірк. Ніводнага слова пра смерць беларускага трэнера па фрыстайле Мікалая Казекі не напісалі Нацыянальны алімпійскі камітэт, Міністэрства спорту і турызму, іншыя дзяржаўныя органы і СМІ, сведчыць праведзены “Позіркам“ маніторынг.

Казека памёр 10 жніўня на 77-м годзе жыцця.

У той жа час у дзяржСМІ апублікаваная інфармацыя аб памерлай у той жа дзень савецкай акторцы і балярыне Наталлі Трубнікавай.

Мікалай Казека быў адным з найбольш вядомых і тытулаваных трэнераў у гісторыі беларускага спорту. З 1993 года ўзначальваў зборную краіны па фрыстайле. Яго вучні заваявалі восем медалёў на Алімпійскіх гульнях, у тым ліку чатыры залатыя. Сам Казека пачынаў як спартсмен і ў 1972 годзе стаў чэмпіёнам СССР па скачках на батуце.

Створаная ім школа беларускага фрыстайла лічылася адной з найлепшых у свеце.

На Алімпіядзе ў Нагана (Японія) у 1998 годзе Дзмітрый Дашчынскі заваяваў бронзавы медаль. У 2002-м на Гульнях у Солт-Лэйк-Сіці (ЗША) Аляксей Грышын таксама стаў бронзавым прызёрам. У 2006-м у Турыне (Італія) Дашчынскі выйграў срэбра.

У 2010-м у Ванкуверы (Канада) Грышын стаў алімпійскім чэмпіёнам. На Алімпіядзе ў Сочы (Расія) у 2014-м залатыя медалі выйгралі Ала Цупер і Антон Кушнір. У 2018-м у Пхёнчхане (Паўднёвая Карэя) алімпійскай чэмпіёнкай стала Ганна Гуськова.

За свае дасягненні Казека быў удастоены шматлікіх дзяржаўных узнагарод, атрымаў званне заслужанага трэнера. Узнагароджаны медалём “За працоўныя заслугі”, ордэнам Пашаны і ордэнам Айчыны трох ступеняў. У 2014 і 2018 гадах яго прызнавалі найлепшым трэнерам Беларусі.

У жніўні 2020 года ён падпісаў адкрыты ліст прадстаўнікоў спартыўнай галіны з патрабаваннем прызнаць несапраўднымі прэзідэнцкія выбары. Пасля гэтага стаўленне ўладаў да трэнера змянілася. Яго адхілілі ад працы са зборнай, у 2022 годзе дэ-факта звольнілі — кантракт не быў падоўжаны.

Міністр спорту і турызму, былы ахоўнік Аляксандра Лукашэнкі Сяргей Кавальчук сцвярджаў, што Казека не пераследуецца з палітычных матываў. “Да яго толькі адно пытанне — п’янства. Злоўжываў нават на зборах. Кажу гэта, вывучыўшы сітуацыю ўсебакова. Вынік выпівак — ДТЗ у Мінску. 2,19 праміле ў крыві! Усе матэрыялы ёсць. Яны адпраўленыя ў Міжнародны алімпійскі камітэт, хай там паглядзяць — палітычныя гэта матывы ці не. Ці галоўнаму трэнеру дазволена тое, што звычайнаму грамадзяніну нельга? Казека напісаў нават ліст на імя прэзідэнта з просьбай вярнуць яму пасведчанне кіроўцы, маўляў, гэта першы выпадак, ніколі такога не было, усё ўсвядоміў і раскаяўся. А мы зрабілі запыт у МУС. Высветлілася: у 2019 годзе — 15 адміністрацыйных парушэнняў з выкарыстаннем аўтамабіля! Перавышэнне хуткасці, праезд на чырвонае святло, паркоўка ў неналежным месцы і ўжыванне спіртных напояў. Вось вам і калі ласка“, — заявіў Кавальчук газеце “СБ. Беларусь сегодня“ (“Советская Белоруссия”) у лютым 2021 года.

Пасля больш чым трох дзесяцігоддзяў працы з беларускім фрыстайлам Казека апынуўся па-за дзяржаўнай спартыўнай сістэмай. Ён выйшаў на пенсію. Пражываў у Мінску.

На Алімпіядзе ў Пекіне (КНР) у 2022 годзе беларускія фрыстайлісты выступалі без Казекі, Гуськова заняла другое месца. На Гульнях-2026 у Мілане і Корціна-д’Ампеца (Італія) беларускі фрыстайл упершыню за 28 гадоў застаўся без медалёў.

11 жніўня памёр вядомы дзеяч беларускага дэмакратычнага руху Аляксандр Мілінкевіч. ДзяржСМІ традыцыйна не паведамляюць аб сыходзе з жыцця апанентаў улады. У адным з прапагандысцкіх тэлеграм-каналаў у гэты дзень з’явіліся пасты абразлівага змесціва на адрас Мілінкевіча.