Урад Грузіі лічыць беларускага праваабаронцу Кісляка пагрозай нацбяспецы і просіць Камітэт ААН па правах чалавека адхіліць яго скаргу на адмову ў прытулку
Раман Кісляк
2 жніўня, Позірк. Адхіліць скаргу беларускага праваабаронцы Рамана Кісляка на адмову ў прытулку просіць Грузія Камітэт ААН па правах чалавека.
Кісляк паведаміў “Позірку”, што камітэт даслаў яму каментар грузінскага ўрада, каб атрымаць тлумачэнні.
Паводле слоў праваабаронцы, улады Грузіі сцвярджаюць, што “старанна вывучылі сітуацыю ў Беларусі”, “была нададзеная належная ўвага характару парушэнняў правоў чалавека”, у судах таксама “ацэньвалі сакрэтную інфармацыю, прадстаўленую Службай дзяржаўнай бяспекі”.
“Акрамя аналізу саміх прычын адмовы ў наданні статусу, суд таксама падрабязна разгледзеў умовы для праваабаронцаў у Беларусі і прыйшоў да высновы, што пагроза, якая ствараецца для [грузінскай] дзяржавы, пераважвае магчымыя парушэнні, з якімі спадар Кісляк можа сутыкнуцца на сваёй радзіме”, — працытаваў ён каментар уладаў Грузіі.
Пры гэтым пагроза бяспецы нібыта “пацвярджаецца надзейнымі доказамі, атрыманымі падчас сакрэтных контрвыведвальных мерапрыемстваў і двойчы разгледжанымі судом”.
Грузінскія ўлады таксама паведамілі камітэту, што вывучылі пагрозы вынясення смяротнага выраку Кісляку ў Беларусі і лічаць, што “такая рызыка не можа быць устаноўленая ў гэтай справе”. Акрамя таго, пакуль ніводнага члена апазіцыі або палітычнага актывіста не прыгаварылі да смерці. На думку ўрада Грузіі, само па сабе існаванне шырока распаўсюджаных парушэнняў правоў чалавека ў Беларусі “не з’яўляецца дастатковай падставай для высновы, што канкрэтнай асобе пасля вяртання будзе пагражаць небяспека катаванняў”.
“На думку ўрада, я ўяўляю значна большую пагрозу бяспецы Грузіі, чым тую пагрозу, якую Аляксандр Лукашэнка ўяўляе для мяне і іншых беларусаў, што супраціўляюцца дыктатуры”, — пракаментаваў Кісляк заўвагі грузінскіх уладаў.
Паводле слоў Кісляка, ён атрымаў два месяцы, каб прадставіць свае заўвагі па каментары ўрада, і ён гэта зробіць. “Улады Грузіі не разумеюць ці робяць выгляд, што не разумеюць, што адбываецца ў Беларусі. І я планую перадаць матэрыялы, якія паказваюць узровень рэпрэсій, катаванняў і пераследу палітычных апанентаў у нашай краіне”, — заявіў праваабаронца.
16 ліпеня супрацоўнікі Памежнай паліцыі МУС Грузіі прыйшлі дадому да Кісляка і склалі пратакол за нелегальнае знаходжанне ў краіне. У лютым 2024 года ў яго скончыўся тэрмін дзеяння беларускага пашпарта. Новы дакумент немагчыма аформіць у амбасадзе Беларусі ў Грузіі праз дыскрымінацыйны ўказ Аляксандра Лукашэнкі. Прытулку праваабаронцу грузінскія ўлады не даюць.
21 ліпеня ў Дэпартаменце міграцыі МУС Грузіі Кісляку паведамілі, што будуць чакаць пастановы камітэта ААН.
Сёлета ў сакавіку улады Грузіі паўторна дэ-факта адмовілі Кісляку ў прытулку. Тады ён паведаміў “Позірку”, што не мае ніякага статусу: ні просьбіта прытулку, ні “ў працэдуры дэпартацыі”.
Дэпартамент міграцыі не задаволіў першае прашэнне праваабаронцы ў жніўні 2024 года — больш як праз год пасля падачы дакументаў. Кісляк з пераменным поспехам аспрэчваў гэтае рашэнне ў судовым парадку, пакуль у ліпені 2025-га Апеляцыйны суд Тбілісі канчаткова не адхіліў скаргу.
Летась у жніўні праваабаронца накіраваў скаргу на адмову ў наданні прытулку ў Камітэт ААН па правах чалавека, які забараніў Грузіі высылаць яго ў Беларусь да завяршэння працэдуры разгляду.
Больш падрабязнасцяў даступна падпісчыкам “Позірк+”
Гл. таксама:
