Літва зафіксавала рэкордную за тры месяцы актыўнасць нелегальных мігрантаў на мяжы з Беларуссю
1 жніўня, Позірк. Рэкордную за апошнія тры месяцы (96 дзён) актыўнасць нелегальных мігрантаў на мяжы з Беларуссю зафіксавала 31 ліпеня Служба аховы дзяржаўнай мяжы (САДМ) Літвы, сведчыць праведзены “Позіркам“ аналіз масіва яе аператыўных даных.
Па выніках мінулага дня САДМ паведаміла аб 40 спробах пранікнення на тэрыторыю краіны.
Папярэдні раз больш было 26 красавіка — 50 спробаў, у наступны перыяд — ад 0 да 38.
У ліпені Літва зарэгістравала 163 спробы незаконнага пранікнення на сваю тэрыторыю з Беларусі — на 73,4% больш, чым у чэрвені (94), на 50,9% больш, чым у траўні (108), у 2,7 раза больш, чым у ліпені 2025 года (60), і на 44,2% больш, чым у ліпені 2024-га (113).
Міграцыйны крызіс на мяжы Беларусі і краін ЕС працягваецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.
Аляксандр Лукашэнка неаднаразова заяўляў, што беларускія пагранічнікі не будуць спыняць нелегальных мігрантаў, якія ідуць у Еўрасаюз праз Беларусь, таму што іх туды нібыта паклікалі.
