Юрыдычныя асобы выбралі гадавую квоту на бяспошлінны ўвоз электрамабіляў, фізічныя — тры чвэрці ліміту
31 ліпеня, Позірк. У рамках гадавой квоты на бяспошлінны ўвоз электрамабіляў фізічныя асобы могуць увезці ў Беларусь яшчэ 1.511 адзінак гэтай тэхнікі, вынікае з паведамлення прэс-службы Дзяржаўнага мытнага камітэта.
Згодна з пастановай Савета міністраў № 223 ад 5 траўня, цягам года фізічныя асобы могуць увезці ў краіну на льготных умовах 6,2 тыс. электрамабіляў. Такім чынам, іх доля квоты выбраная на 75,6%.
Юрыдычныя асобы ў адпаведнасці з гэтым дакументам маглі ўвезці без выплаты мыта 13,8 тыс. электрамабіляў. Сваю частку квоты яны, як вынікае з даных ДМК, ужо вычарпалі. “З улікам вычарпання квоты на бяспошлінны ўвоз электрамабіляў юрыдычнымі асобамі пры планаванні імпарту варта ўлічваць неабходнасць выплаты ўвазной мыты ў памеры 15% ад кошту транспартнага сродку”, — падкрэсліла ведамства.
14 ліпеня ДМК паведаміў, што юрыдычныя асобы вычарпалі свой гадавы ліміт на 94,1%, фізічныя — на 68%.
Раней кіраўнік ведамства Уладзімір Арлоўскі заяўляў, што агульны ліміт для Беларусі вызначаны ў рамках дамоўленасцяў у Еўразійскім эканамічным саюзе: “Квота ўсталяваная ў памеры 20 тыс. аўтамабіляў [на год]”.
Абмежаванне ўведзенае рашэннем ЕЭК летась у снежні.
У чэрвені 2026 года прадпрыемства “Белтэхагляд” выдала на электрамабілі 2.696 дазволаў (годам раней — 1.635; рост у 1,6 раза) на допуск да ўдзелу ў дарожным руху.
Паводле даных “БАА-Кансалт” (даччынае прадпрыемства Беларускай аўтамабільнай асацыяцыі), па выніках чэрвеня прададзена 2,4 тыс. адзінак — на 31% менш за майскі вынік. Адзначалася, што “такое зніжэнне асабліва прыкметнае на фоне папярэдніх месяцаў, калі менавіта электрамабілі былі адным з найбольш хуткарослых сегментаў рынку новых аўтамабіляў”.
Паводле тыпаў рухавікоў прададзеныя ў Беларусі ў 2025 годзе мадэлі размеркаваліся наступным чынам: РУЗ — 82,17% агульнай колькасці, электрычныя — 12,48%, гібрыды — 5,35%.
