За паўгода пракуратура выявіла ў Магілёўскай вобласці 243 “экстрэмісцкія” інтэрнэт-рэсурсы

21 ліпеня, Позірк. У першым паўгоддзі 2026 года ў Магілёўскай вобласці выяўлена 234 “дэструктыўныя інфармацыйныя каналы” ў інтэрнэце, паведамляе Генеральная пракуратура.

У суды накіраваныя заявы аб прызнанні згаданай інфармацыйнай прадукцыі “экстрэмісцкімі матэрыяламі”.

“Аналіз паведамленняў, пастоў, відэафайлаў і іншага апублікаванага кантэнту паказаў, што ён накіраваны на дэстабілізацыю грамадска-палітычнай і сацыяльна-эканамічнай абстаноўкі ў краіне, а таксама папулярызацыю пратэстнай актыўнасці”, — адзначаецца ў паведамленні.

Падкрэсліваецца, што асаблівая ўвага надавалася “выяўленню інфармацыйных крыніц, якія спрыялі рэабілітацыі нацызму, распаўсюджванню нацысцкай сімволікі і атрыбутыкі”.

Пракуратура Чавускага раёна ў месенджары “Тэлеграм” выявіла 119 стыкераў пад назвай “Nazi to die”, адзначае ведамства, гэтыя стыкеры прадстаўленыя ў выглядзе піктаграм-эмаціконаў з выявай Адольфа Гітлера і анімэ-персанажаў. На стыкерах, як заяўляецца, дэманстравалася нацысцкая сімволіка і атрыбутыка ў выглядзе свастык, рун, у тым ліку сімвалаў “Мёртвай галавы” і “нацысцкага арла”, сонечнага кола “Чорнае сонца”, сцяга нацысцкай Германіі.

У выніку паводле заявы пракурора Чавускага раёна тэлеграм-стыкеры прызнаныя “экстрэмісцкімі матэрыяламі”.

8 ліпеня паведамлялася, што паводле пастаноў пракурора Магілёўскай вобласці ў першым паўгоддзі 2026 года абмежаваны доступ да дзевяці інтэрнэт-рэсурсаў.

Сілавыя структуры атрымалі права блакаваць інтэрнэт-рэсурсы ў верасні 2025 года згодна з пастановай урада № 476 “Аб парадку прымянення мер абмежавальнага характару”.

Пасля падзей 2020 года ўлады ўзмацнілі кантроль за распаўсюджваннем інфармацыі ў інтэрнэце.

Крытыка рэжыму Аляксандра Лукашэнкі прыводзіць да вызначэння інтэрнэт-рэсурсаў “экстрэмісцкімі”, дэ-факта пераводзячы іх у разрад забароненых і пераследаваных.

Такі статус у Беларусі за апошнія пяць гадоў атрымала большасць незалежных СМІ.