Пракуратура за паўгода выявіла ў Віцебску на 30% больш карупцыйных правапарушэнняў, чым год таму

20 ліпеня, Позірк. У студзені — чэрвені 2026 года ў Віцебску выяўлена 40 карупцыйных правапарушэнняў — на 30% больш, чым за першае паўгоддзе 2025-га, паведамляе прэс-служба Генеральнай пракуратуры.

Парушэнні зафіксаваны ў сферах будаўніцтва, аховы здароўя, адукацыі і гандлю.

Як адзначаецца, “найбольш распаўсюджанай формай карупцыйнай злачыннасці застаецца хабарніцтва”: “Пераважна такія парушэнні фіксуюцца ў сферы закупак, дзе ствараюцца ўмовы для лабіравання інтарэсаў асобных юрыдычных і фізічных асоб, атрымання “адкатаў” і атрымання злачыннай выгады”.

Нараўне з гэтым пракурорскія праверкі выявілі і “іншыя формы карупцыйных рызык”, у тым ліку звязаныя з канфліктам інтарэсаў і парушэннямі парадку правядзення дзяржаўных закупак.

У сувязі з гэтым было адменена 37 працэдур закупак, агульны лімітавы кошт якіх перавышае 2 млн рублёў. Да розных відаў адказнасці прыцягнута 79 службовых асоб.

Паводле даных Вярхоўнага суда, у 2025 годзе за ўчыненне карупцыйных злачынстваў асуджана 657 асоб — на 7,3% менш, чым у 2024-м (709). З асуджаных 199 чалавек прыгавораны да розных тэрмінаў пазбаўлення волі. Пазбаўленне права займаць пэўную пасаду або займацца пэўнай дзейнасцю ў якасці асноўнай меры пакарання прызначана 17 асобам, у якасці дадатковай — 557.

Летась самы буйны хабар быў атрыманы ў крыптавалюце — на суму, эквівалентную 360 тыс. долараў, паведаміў у сакавіку прадстаўнік Галоўнага ўпраўлення па барацьбе з арганізаванай злачыннасцю і карупцыяй МУС Дзяніс Гарлуковіч.

Аляксандр Лукашэнка прыйшоў да ўлады ў 1994 годзе шмат у чым дзякуючы вобразу змагара з карупцыяй і працягвае выкарыстоўваць гэтую тэму. За больш за 30 гадоў карупцыя так і не была пераможана.