Памежная служба Украіны паведаміла пра стварэнне “кіл-зоны” на мяжы з Беларуссю
19 ліпеня, Позірк. Аб стварэнні “кіл-зоны”* на мяжы з Беларуссю паведаміла Дзяржаўная памежная служба Украіны (ДПСУ).
З апублікаванага 19 ліпеня пагранслужбай ютуб-відэа вынікае, што гэта робіцца для эфектыўнай абароны тэрыторыі ў выпадку паўторнага нападу з боку Беларусі.
“Памежнікі рыхтуюцца да магчымага наступу з тэрыторыі Беларусі. Менавіта пра такую пагрозу папярэджвае ўкраінская выведка”, — адзначае ДПСУ.
Паведамляецца, што цяпер на паўночнай мяжы краіны размешчаныя супрацьтанкавыя равы, шматузроўневыя загароды з калючага дроту, шэрагі бетонных “зубоў дракона”.
Гэта — “толькі частка ўмацаванняў, якія ўзводзяць вайскоўцы ДПСУ на паўночнай мяжы”, падкрэслівае ведамства.
Абаронныя мерапрыемствы памежнікі праводзяць таксама на вадзе, у тым ліку на астравах ракі Днепр.
Адзін з вайскоўцаў ДПСУ паведаміў у відэа, што ўкраінскія нарады, патрулюючы мяжу на вадзе, часам “сустракаюцца” з беларускімі патрулямі. “Ніякіх правакацыйны дзеянняў з іх боку не адбываецца”, — адзначыў ён.
Адзначаецца, што працягласць украінска-беларускай мяжы па Дняпры складае звыш 100 кіламетраў.
Сітуацыю на мяжы ўкраінскія вайскоўцы адсочваюць з дапамогай сродкаў аэраразведкі — у тым ліку беспілотнікаў. Пры гэтым у распараджэнні памежнікаў маюцца таксама ўдарныя дроны.
У апошнія гады Украіна сістэматычна ўмацоўвае мяжу з Беларуссю. Пры гэтым у 2026 годзе ўкраінскія ўлады ўсё часцей папярэджваюць аб імкненні Масквы непасрэдна ўцягнуць Мінск у вайну супраць Кіева.
24 лютага 2022 года Расія пачала поўнамаштабную вайну супраць Украіны — найбуйнейшую ў Еўропе пасля Другой сусветнай. Рэжым Аляксандра Лукашэнкі надаў войску РФ тэрыторыю для нападу на суседнюю краіну ўзімку і ўвесну 2022 года, а пасля на працягу многіх месяцаў з Беларусі вяліся абстрэлы ўкраінскіх гарадоў. На тэрыторыі краіны таксама лячылі расійскіх вайскоўцаў. Паводле звестак журналістаў-расследавальнікаў, многія беларускія прадпрыемствы зараз актыўна займаюцца вытворчасцю на карысць расійскага вайскова-прамысловага комплексу.
* “Кіл-зона” — участак мясцовасці або прыфрантавая паласа (звычайна глыбінёй да 10–15 кіламетраў), дзе праз шчыльнае выкарыстанне беспілотнікаў, артылерыі і мін перамяшчэнне праціўніка спалучана з вялікай рызыкай агнявога паражэння. Выкарыстоўваецца ўкраінскімі вайскоўцамі на ўчастках баявога судакранання з акупацыйнай арміяй РФ.
Зяленскі адвёў Лукашэнку тыдзень на зняцце рэтранслятараў для дронаў, заклікаў спыніць пастаўку нафтапрадуктаў расійскаму войску
19 чэрвеня, Позірк. Прэзідэнт Украіны Уладзімір Зяленскі даў Аляксандру Лукашэнку тыдзень на зняцце з вышак рэтранслятараў для навядзення дронаў уздоўж мяжы з Украінай. "Калі ён гэта не зробіць, зробім мы“, — заявіў Зяленскі 19 чэрвеня ў Кіеве на супольнай прэс-канферэнцыі …
