Дададзены 6-ы абзац.
1 ліпеня, Позірк. Тры чалавекі патанулі ў Беларусі за мінулыя дзяжурныя суткі (з 6:00 30 чэрвеня па 6:00 1 ліпеня), паведамляецца ў зводцы Міністэрства па надзвычайных сітуацыях.
Усе загінулыя — мужчыны.
У чэрвені (Мінская вобласць) у возеры Натальеўскае патануў пенсіянер 1966 года нараджэння.
У рацэ Сеніца аднайменнага аграгарадка Мінскага раёна знойдзена цела непрацуючага грамадзяніна 1965 г.н.
У возеры ў пасёлку Дамачава Брэсцкага раёна патануў грамадзянін 1993 г.н.
Пры гэтым Рэспубліканскае таварыства ратавання на водах (ТРВОД) паведамляе, што за мінулыя суткі ў Беларусі патанула пяць чалавек. Падрабязнасці не прыводзяцца.
Суткамі раней МНС паведамляла пра патанулага 29 чэрвеня пенсіянера 1962 г.н. у штучным вадаёме на тэрыторыі прыватнага домаўладання ў вёсцы Востраў Глыбоцкага раёна (Віцебская вобласць).
За выхадныя 27–28 чэрвеня, паводле інфармацыі ТРВОД, у Беларусі патанула 15 чалавек.
На 1 ліпеня Белгідраметам абвешчаны чырвоны ўзровень небяспекі ў сувязі са спякотай. Прагназуецца, што ў дзённыя гадзіны на большай частцы тэрыторыі краіны максімальная тэмпература паветра складзе +30–34°C, па паўднёвым захадзе +35–37°C. У Мінску чакаецца +30–32°C.
