1 ліпеня, Позірк. У чэрвені ў Беларусь прыбыло 7 669 грамадзян Украіны, паведамляе прэс-служба Дзяржаўнага памежнага камітэта.
У траўні іх колькасць складала 8.382.
Непасрэдна праз украінска-беларускую мяжу ў чэрвені прайшло 7 чалавек (у траўні — 10), транзітам праз Польшчу — 6.722 (7.449), Літву — 873 (864), Латвію — 67 (59).
З 1 студзеня да 1 ліпеня 2026 года ў Беларусь уехала 44.390 грамадзян Украіны: праз украінска-беларускую мяжу — 33, транзітам праз Польшчу — 39.414, Літву — 4.692, Латвію — 251.
Якія мэты прыбыцця, дакладна невядома. Аднак, паводле неафіцыйнай інфармацыі, значная частка грамадзян Украіны прыязджае ў Беларусь для таго, каб пасля трапіць на акупаваныя РФ украінскія тэрыторыі — наведаць сваякоў або паспрабаваць абараніць сваю маёмасць, якую нацыяналізуюць расійскія ўлады ў тых, хто з’ехаў у краіны ЕС. З краін Еўропы арганізоўваюць адмысловыя туры.
Крыніцы “Позірку” паведамляюць, што на практыцы частку ўкраінцаў без тлумачэння прычын не ўпускаюць у Беларусь. Разам з тым многія даязджаюць да Масквы. У аэрапорце Шарамеццева праводзіцца фільтраванне — абавязковая працэдура для грамадзян Украіны, што прыбываюць у РФ, якая ўключае дагляд, анкетаванне, праверку мабільных прыладаў і гутарку з супрацоўнікамі спецслужбаў (ФСБ). Працэдура цягнецца ад некалькіх гадзін да двух сутак, узровень адмоў — 30–50%. Тыя, каму адмовілі, едуць назад праз Беларусь у краіны ЕС.
У лютым 2024 года Ігар Кізім, які на той момант займаў пасаду амбасадара па асаблівых даручэннях МЗС Украіны па Беларусі, заявіў у інтэрв’ю “Позірку”, што “Дзяржпагранкамітэт Беларусі займаецца несумленнай падачай лічбаў і чыстай вады маніпуляцыяй”, мяркуючы з усяго, маючы на ўвазе, што прапаганда спрабуе паднесці гэта як уцёкі ўкраінскіх грамадзян са сваёй краіны, а пасля і з краін ЕС у “мірную і стабільную Беларусь”.
“Самае цікавае, што вы нідзе не знойдзеце ў адкрытых крыніцах звестак пра колькасць ўкраінцаў, якія выехалі з вашай краіны. Сумленным і прыстойным з боку ДПК было б даваць гэтую статыстыку. Насамрэч гаворка ідзе не пра транзітных уцекачоў або людзей, якія ўехалі ў Беларусь, каб папрасіць прытулак. Гэта, як і раней, простыя паездкі ўкраінскіх грамадзян”, — заявіў тады дыпламат.
25 чэрвеня МЗС Беларусі ўручыла часоваму паверанаму ў справах Украіны ў Мінску Івану Навіцкаму ноту з прапановай арганізаваць “сезонны пропуск памежнага насельніцтва на тэрыторыю Беларусі для збору дзікаросаў”. У Дзяржаўнай памежнай службе Украіны, каментуючы прапанову, адзначылі, што Кіеў “не пагодзіцца на гэта, таму што гэта (мяжа з Беларуссю) небяспечная лінія і пропуск у краіну, якая падтрымлівае краіну-тэрарыстку (РФ. — “Позірк”.), немагчымы“.
Згодна з апошнімі апублікаванымі данымі ААН, па ўсім свеце на 30 красавіка 2026 года было 5.762.290 украінскіх уцекачоў (на 14 лістапада мінулага года іх было 5.880.360), у тым ліку ў краінах Еўропы — 5.213.200 (5.331.720).
