СБУ завочна абвінаваціла генералаў РФ у гібелі двух беларусаў у Жытомірскай вобласці ў сакавіку 2022 года

30 чэрвеня, Позірк. Пра збор доказнай базы ў дачыненні да “двух прадстаўнікоў вышэйшага камандавання ўзброеных адзінак РФ, якія спланавалі і аддалі загад на паветраны ўдар па горадзе Корасцень у Жытомірскай вобласці ў ноч з 9 на 10 сакавіка 2022 года”, паведаміла Служба бяспекі Украіны (СБУ).

Ведамства нагадала, што “ў выніку варожай атакі па жылых кварталах ды іншай грамадзянскай інфраструктуры райцэнтра адзін мясцовы жыхар атрымаў цяжкія раненні і двое грамадзян Рэспублікі Беларусь загінулі”.

У выніку расследавання, як заяўлена, было высветлена, што рашэнне атакаваць грамадзянскія аб’екты Корасценя прынялі генерал-палкоўнік Аляксандр Чайко (на той момант камандуючы войскамі Усходняй ваеннай акругі РФ) і генерал-лейтэнант Уладзімір Краўчанка (камандуючы групоўкай авіяцыі аператыўнай групоўкі войскаў РФ “Усход”).

Паводле інфармацыі СБУ, на загад генералаў іх падначаленыя нанеслі ўдар па Корасценю сама меней 12 фугаснымі і аскепкава-фугаснымі бомбамі, вырабленымі на заводах расійскага навукова-вытворчага аб’яднання “Базальт”.

Для ўдару па горадзе ў паветра былі паднятыя два расійскія бамбавікі.

Следчыя СБУ “завочна паведамілі абодвум фігурантам пра падазрэнне” паводле ч. 2 арт. 28, ч. 2 арт. 438 КК Украіны (парушэнне законаў і звычаяў вайны, прадугледжаных міжнароднымі дагаворамі, здзейсненыя з наўмысным забойствам з папярэдняй змовы групай асоб).

Праводзяцца “комплексныя мерапрыемствы па прыцягненні вінаватых да адказнасці”.

18 сакавіка 2022 года тагачасны прэс-сакратар МЗС Беларусі Анатоль Глаз паведаміў, што на радзіму за дзень да таго былі дастаўленыя целы двух беларускіх кіроўцаў-дальнабойшчыкаў, якія загінулі ў выніку расійскага авіяналёту на ўкраінскі Корасцень.

“10 сакавіка Міністэрствам замежных спраў атрыманая і пацверджаная трагічная інфармацыя пра гібель у горадзе Коросцень Жытомірскай вобласці Украіны двух нашых грамадзян, — сказаў тады прадстаўнік знешнепалітычнага ведамства. — Гаворка пра дальнабойшчыкаў, якія не паспелі пакінуць зону канфлікту і былі вымушаныя пражываць у сваіх машынах у чаканні магчымасці выехаць у Беларусь. Тады многія СМІ, уключаючы замежныя, распавядалі гэтую гісторыю. Але абавязкам беларускага боку, нягледзячы на ​​ўсю складанасць сітуацыі, было аказанне дапамогі сваякам гэтых людзей у вяртанні на радзіму целаў сваіх блізкіх. Сёння гэтая праца завершаная, і яны дастаўленыя на тэрыторыю Рэспублікі Беларусь”.

7 красавіка таго ж года Аляксандр Лукашэнка на пасяджэнні Савета бяспекі заявіў пра “бліскучую аперацыю” КДБ па вяртанні з Украіны “дзясяткаў беларускіх дальнабойшчыкаў”.

31 траўня ён “узнагародзіў супрацоўнікаў Камітэта дзяржбяспекі, якія ўдзельнічалі ў спецаперацыі КДБ на тэрыторыі Украіны”.

“Дзякую вам за тую аперацыю, якую вы правялі па вызваленні нашых людзей фактычна з палону. Некалькі дзесяткаў беларускіх грамадзян, відавочна не па сваёй волі, апынуліся закладнікамі, і не толькі сітуацыі, але і асобных жаданняў самых дрэнных людзей ва Украіне”, — цытаваў палітыка неафіцыйны тэлеграм-канал яго прэс-службы.

“На жаль, па-мойму, у двух чалавек так і не атрымалася вярнуцца дадому. Яны былі нахабна былі забітыя ўкраінцамі. Наспее час, мы разбярэмся і з імі, — сказаў ён. — Я памятаю, тады сказаў пра тое, што калі нам не вернуць хлопцаў, то мы правядзем спецаперацыю, у тым ліку і вострую, для вызвалення нашых хлопцаў. Камітэту дзяржбяспекі было даручана падрыхтаваць гэтае мерапрыемства і вызваліць нашых людзей”.

У кастрычніку 2024 года ў інтэрв’ю “Бі-Бі-Сі” на палях саміту БРІКС у Казані палітык, як адзначаў Беларускі расследвальніцкі цэнтр, заяўляў ужо пра пяць беларусаў — кіроўцаў фур, нібыта забітых украінцамі на пачатку вайны.

Паводле звестак МЗС Беларусі, на момант пачатку баявых дзеянняў 24 лютага 2022 года на ўкраінскай тэрыторыі знаходзілася 290 беларускіх кіроўцаў велікагрузных аўтамабіляў.