Сі Цзіньпін: Кітай і Беларусь павінны захоўваць стратэгічную камунікацыю

29 чэрвеня, Позірк. Кітай і Беларусь “павінны захоўваць стратэгічную камунікацыю і працягваць прасоўваць двухбаковыя стасункі на высокім узроўні дзеля большага дабрабыту народаў дзвюх краін”, заявіў старшыня КНР 29 чэрвеня ў Пекіне на сустрэчы з Аляксандрам Лукашэнкам.

Кітайскі бок, паводле слоў кіраўніка краіны, якія прыводзіць МЗС КНР, падтрымлівае Беларусь “у абароне дзяржаўнага суверэнітэту, незалежнасці і тэрытарыяльнай цэласнасці, а таксама ў выбары шляху развіцця, які адпавядае яе ўласным нацыянальным умовам”, гатовы “і надалей па меры магчымасцей садзейнічаць развіццю і будаўніцтву Беларусі”. Пры гэтым ён не ўдакладніў, што пагражае тэрытарыяльнай цэласнасці беларускай дзяржавы.

Сі Цзіньпін адзначыў, што Кітай і Беларусь — “сапраўдныя сябры, якія давяраюць адзін аднаму і падтрымліваюць адзін аднаго; добрыя партнёры, якія сумесна імкнуцца да развіцця і працвітання; а таксама ўсепагодныя ўсёабдымныя стратэгічныя партнёры”.

На яго думку, кітайска-беларускія стасункі “вытрымалі выпрабаванне міжнароднай абстаноўкай, а ў апошнія гады здзейснілі якасны скачок і ўвайшлі ў лепшы перыяд за ўсю гісторыю”. Палітычны давер паміж бакамі “трывалы як скала”, а сумеснае “высакаякаснае будаўніцтва” ініцыятывы “Адзін пояс — адзін шлях” прынесла “багатыя вынікі”, ключавыя праекты супрацы “ўстойліва прасоўваюцца”, узаемадзеянне на шматбаковых пляцоўках “выявілася эфектыўным”.

Старшыня КНР падкрэсліў, што “паглыбленне ўсепагоднай і ўсебаковай супрацы Кітая і Беларусі адпавядае гістарычным тэндэнцыям развіцця і адпавядае карэнным інтарэсам народаў дзвюх краін”.

На думку Сі Цзіньпіна, Беларусь і Кітай “маюць мабілізаваць рэсурсы розных бакоў для прасоўвання будаўніцтва ў рамках ініцыятывы “Адзін пояс — адзін шлях” і напоўніць практычную супрацу новым зместам”.

На сустрэчы было заяўлена, што “кітайскі бок гатовы сумесна з Беларуссю будаваць супольнасць адзінага лёсу чалавецтва, ажыццяўляць чатыры глабальныя ініцыятывы і ўзмацняць каардынацыю і ўзаемадзеянне ў рамках такіх шматбаковых механізмаў, як ААН і ШАС, каб быць сілай стабільнасці ў нестабільным свеце”.

У сваю чаргу Лукашэнка заявіў, што Кітай ёсць “ўсепагодным стратэгічным партнёрам Беларусі, а практычная супраца паміж дзвюма краінамі мае ўсебаковы і глыбокі характар ​​і аказвае важную падтрымку сацыяльна-эканамічнаму развіццю Беларусі”.

Госць адзначыў, што Мінск высока цэніць стасункі з Кітаем і “разлічвае ўмацоўваць стратэгічную камунікацыю, пашыраць сферы супрацы і дамагацца далейшага развіцця двухбаковых стасункаў”.

“Лукашэнка таксама заявіў, што чатыры глабальныя ініцыятывы, вылучаныя Сі Цзіньпінам, садзейнічаюць палітычнаму ўрэгуляванню гарачых міжнародных пытанняў і робяць значны ўнёсак у мір, стабільнасць і працвітанне ва ўсім свеце, — паведамляе кітайскі МЗС. — Беларускі бок гатовы працягваць шчыльную каардынацыю з рэгіёнам і Кітаем па каардынацыі стабільнасці ў свеце і рэгіёне”.

Палітыка Эканоміка

Палітыка, Эканоміка

Лукашэнка выступіў за ўмацаванне сувязей Беларусі і Кітая

29 чэрвеня, Позірк. За ўмацаванне сувязей Беларусі і Кітая выступіў Аляксандр Лукашэнка 29 чэрвеня ў Пекіне на перагаворах са старшынёй КНР Сі Цзіньпінам. Прыкладам "паспяховага ўзаемадзеяння" беларускі госць назваў сумесны індустрыяльны парк "Вялікі камень", у якім "вялікая частка замежных інвестыцый …

Чытаць