Пацярпелага ў Бранскай вобласці хлопчыка прааперуе мультыдысцыплінарная брыгада
19 чэрвеня, Позірк. Стан усіх пацярпелых у Бранскай вобласці пацыентаў пасля першай праведзенай ва ўстановах аховы здароўя Мінска ночы застаецца стабільным, паведамляе Гомельскі аблвыканкам са спасылкай на Міністэрства аховы здароўя Беларусі.
“Што тычыцца найбольш цяжкага пацыента, ён знаходзіцца ў аддзяленні анестэзіялогіі і рэанімацыі. Плануецца, што сёння яго прааперыруе мультыдысцыплінарная брыгада, у складзе якой будуць дзіцячыя хірургі, лор, сківічна-тварны хірург, траўматолагі, афтальмолаг”, — гаворыцца ў рэлізе.
Дарослы пацыент, шпіталізаваны ў Галоўны ваенны медыцынскі клінічны цэнтр № 432 Узброеных сіл, як паведамляецца, “таксама стабільны”, знаходзіцца ў стане сярэдняй цяжкасці.
17 чэрвеня аўтобус з выхаванцамі рэчыцкай дзіцяча-юнацкай спартыўнай школы № 2 (Гомельская вобласць) трапіў пад удар у Бранскай вобласці РФ. У транспартным сродку, які рухаўся з Рэчыцы ў Геленджык, знаходзілася 44 пасажыры, з іх 28 дзяцей-спартсменаў 2014-2015 гадоў нараджэння.
Першапачаткова паведамлялася, што пацярпела восем чалавек, у тым ліку шасцёра дзяцей. Пазней МЗС Беларусі ўдакладніў, што пацярпелых шэсць (пяць — дзеці). Іх шпіталізавалі ў бальніцы Бранскай вобласці (аднаму дзіцяці зробленая аперацыя).
Сярод суправаджальнікаў была жонка трэнера з Рэчыцкай ДЮСШ-2 Вікторыя Гарошка, яна загінула.
У дзень інцыдэнту Генеральны штаб Узброеных сіл Украіны заявіў, што ўкраінскі бок не мае дачынення да ўдару па аўтобусе. Абвінавачанні ў гэтым спікер Генштаба Андрэй Кавалёў назваў “чарговай інфармацыйнай правакацыяй Крамля”.
Ваеннае камандаванне заявіла таксама, што ў пазначаны перыяд Сілы абароны Украіны не ўжывалі беспілотныя лятальныя апараты па цэлях на тэрыторыі Бранскай вобласці.
Упаўнаважаны Вярхоўнай Рады па правах чалавека Дзмітрый Лубінец “тэрмінова звязаўся” з беларускім бокам і выказаў жаданне далучыцца да празрыстага і бесстаронняга ўстанаўлення ўсіх фактаў і абставінаў гэтага здарэння.
Мінск услед за Масквой абвінавачвае ў тым, што здарылася, Украіну.
