Лета 2026 года на большай частцы тэрыторыі Беларусі чакаецца цяплей за норму з дэфіцытам ападкаў
9 чэрвеня, Позірк. На большай частцы тэрыторыі Беларусі з верагоднасцю да 60% лета 2026 года будзе цяплей за норму, на поўначы — у межах нормы. Пра гэта паведаміла начальнік службы метэаралагічных прагнозаў Белгідрамета Марына Грыцкевіч на прэс-канферэнцыі 9 чэрвеня.
Таксама на большай частцы тэрыторыі з верагоднасцю да 60% будзе назірацца дэфіцыт ападкаў, а на крайнім паўднёвым захадзе — з верагоднасцю да 75%. На паўночным усходзе колькасць ападкаў чакаецца ў межах нормы.
Чэрвень, як прагназуецца, будзе цяплей за норму на 1 градус з ападкамі ў межах нормы.
Паводле слоў начальніка аддзела вывучэння змяненняў клімату службы метэаралагічнага і кліматычнага маніторынгу, фонду даных Белгідрамета Вольгі Бакланавай, самым гарачым за ўвесь перыяд інструментальных метэаназіранняў (з 1881 года) было лета 2010 года з сярэдняй тэмпературай 20,6 градуса цяпла (на 2,6 вышэй за норму). Самым халодным было лета 1928 года — 14,6 градуса ў сярэднім за сезон. Пры гэтым Бакланава прывяла паказчык адхілення толькі ад сучаснай нормы (-3,4).
