У Беларусі правяраюць баявую гатоўнасць артылерыйскай брыгады з улікам “досведу ваенных канфліктаў ва Украіне і Іране”

24 жніўня, Позірк. Распараджэнне на выкананне навучальна-баявых задач “адной з артылерыйскіх брыгад Узброеных сіл цэнтральнага падпарадкавання” уручыў 24 жніўня міністру абароны Віктару Хрэніну дзяржаўны сакратар Савета бяспекі Аляксандр Вальфовіч.

Паводле слоў чыноўніка, на якога спасылаецца прэс-служба Міністэрства абароны, брыгада “будзе прыведзеная ў гатоўнасць да выканання задач паводле прызначэння з адмабілізаваннем і даўкамплектаваннем да штатаў ваеннага часу асобных падраздзяленняў”.

“У адрозненне ад папярэдняй праверкі, дзе распараджэнні ўручаліся непасрэдна камандзірам вайсковых часцей, асаблівасцю цяперашняга кантролю з’яўляецца праверка функцыянавання ўсёй вертыкалі кіравання ад міністра абароны да камандзіра асобнага падраздзялення, — заявіў Вальфовіч. — Асаблівая ўвага будзе нададзеная пытанням выкарыстання сучасных спосабаў агнявога паражэння і кіравання ім з улікам досведу ваенных канфліктаў ва Украіне і Іране”.

Дзяржсакратар Савета бяспекі адзначыў, што мэтай “мерапрыемстваў, спланаваных у другім навучальным паўгоддзі”, з’яўляюцца вывучэнне таго, “ці выпраўленыя недахопы, выяўленыя падчас папярэдняй праверкі”, а таксама праверка гатоўнасці злучэнняў і вайсковых часцей “да вядзення баявых дзеянняў у сучасных умовах”.

“Адначасова адзначу, што пад праверкі дзяржаўнага сакратарыята Савета бяспекі трапяць фарміраванні і іншых сілавых ведамстваў”, — заявіў чыноўнік.