Кіраўнік каталіцкага епіскапату Беларусі паскардзіўся на востры брак святароў
28 траўня, Позірк. Пра брак каталіцкіх святароў у краіне заявіў у інтэрв’ю Vatican News старшыня Канферэнцыі каталіцкіх біскупаў Беларусі, мітрапаліт Мінска-Магілёўскі Іосіф Станеўскі.
Іерарх знаходзіцца ў Ватыкане на Генеральнай асамблеі Канферэнцыі каталіцкіх біскупаў Італіі.
Паводле слоў Станеўскага, “асобным пунктам для беларускіх вернікаў застаецца стварэнне ўласнай духоўнай пляцоўкі ў Вечным горадзе”. Аднак для рэалізацыі гэтай ініцыятывы неабходна накіраваць у Рым беларускіх святароў.
У гэтым кантэксце мітрапаліт заявіў, што кадравае пытанне для касцёла “застаецца вострым: колькасць духавенства ў самой Беларусі паступова скарачаецца, асабліва ва ўсходніх рэгіёнах“.
У Магілёўскай вобласці адзін святар вымушаны абслугоўваць тры парафіі, “пераадольваючы сотні кіламетраў”, дадаў іерарх.
Сітуацыя ўскладняецца і тым, што святары з Польшчы, якія служылі дзесяцігоддзямі, усё часцей не атрымліваюць дазволу на далейшую працу, адзначыў ён.
У такіх умовах накіраванне людзей у Рым “пакуль застаецца хутчэй надзеяй, чым бліжэйшай перспектывай“.
Vatican News паведамляе, што “арцыбіскупа Станеўскага чакае сустрэча з [папам] Львом XIV у рамках пасяджэння італьянскага епіскапату”. Адзначаецца, што на ёй ён мае намер у чарговы раз выказаць падзяку пантыфіку за духоўную падтрымку і паўтарыць запрашэнне наведаць Беларусь.
27 траўня стала вядома пра сустрэчу папы рымскага ў Ватыкане з беларускім праваабаронцам, кіраўніком праваабарончага цэнтра “Вясна”, лаўрэатам Нобелеўскай прэміі міру Алесем Бяляцкім.
Экс-палітвязень перадаў пантыфіку асабістае пасланне, у якім апроч іншага гаворыцца пра пераслед у Беларусі вернікаў і святароў розных канфесій.
20 мая ініцыятыва ” Хрысціянская візія“ паведаміла пра адмову беларускіх уладаў падоўжыць дазвол на далейшае служэнне ў Беларусі пяці каталіцкім святарам і аднаму манаху Мінска-Магілёўскай архідыяцэзіі, якія маюць польскае грамадзянства.
Раней стала вядома пра адмову дазволіць далейшае служэнне тром каталіцкім польскім святарам у Віцебскай дыяцэзіі, да гэтага — двум святарам у Пінскай дыяцэзіі.
Многія вернікі і рэлігійныя дзеячы адкрыта выказваліся аб грамадска-палітычным крызісе, які ўзнік на фоне сфальсіфікаваных прэзідэнцкіх выбараў 2020 года і жорсткасці сілавікоў у дачыненні да ўдзельнікаў пратэстных акцый, з прычыны чаго рэжым Лукашэнкі ўзмацніў кантроль рэлігійнай сферы.
У 2023 годзе на заканадаўчым узроўні рэлігійным арганізацыям фактычна было забаронена праяўляць палітычную актыўнасць не ў фарватары ўладаў, была абвешчаная перарэгістрацыя.
З пачатку восені 2020 года па канец красавіка 2026-га, паводле звестак “Хрысціянскай візіі“, з рэпрэсіямі ў Беларусі ў той ці іншай форме сутыкнулася не менш за 93 хрысціянскіх служыцелі, сярод іх 36 каталіцкіх.
