Бяляцкі папрасіў папу рымскага пра ўвагу да “гуманітарнай катастрофы” ў Беларусі (дапоўнена)

Дададзеныя абзацы 3–8.

27 траўня, Позірк. Пра сустрэчу 27 траўня ў Ватыкане папы рымскага Льва XIV і беларускага праваабаронцы, кіраўніка праваабарончага цэнтра “Вясна” і лаўрэата Нобелеўскай прэміі міру Алеся Бяляцкага паведаміла ініцыятыва “Хрысціянская візія”.

Бяляцкі “распавёў папу пра сітуацыю з правамі чалавека ў Беларусі, папрасіўшы аб малітве і ўвазе да той гуманітарнай катастрофы, якая разгортваецца ў нашай краіне”, гаворыцца ў паведамленні.

Адзначаецца, што праваабаронца перадаў пантыфіку “асабістае пасланне”.

У ім Бяляцкі “апісвае сітуацыю з правамі чалавека і свабодай веравызнання ў Беларусі”. “Ён нагадвае, што сёння ў краіне знаходзіцца каля тысячы палітычных зняволеных, сярод іх жанчыны і пажылыя людзі, хворыя і інваліды, шматдзетныя бацькі. Асобна праваабаронца піша пра пераслед вернікаў і святароў розных канфесій: каталіцкіх, праваслаўных і пратэстанцкіх. Ён згадвае айца Анатоля Парахневіча, арыштаванага ў сакавіку 2026 года, які перанёс інфаркт у зняволенні, але працягвае заставацца за кратамі”, — удакладняе ініцыятыва.

Бяляцкі ў пасланні таксама выказвае падзяку Святому Пасаду за вызваленне святароў Генрыха Акалатовіча і Анджэя Юхневіча ў лістападзе 2025 года, аднак адзначае, што “пераслед не спыніўся: святары не могуць вярнуцца ў свае прыходы, а іх маёмасць канфіскаваная”.

Праваабаронца таксама звяртае ўвагу папы рымскага на “сістэматычнае знішчэнне рэжымам легальных падстаў для служэння каталіцкай царквы ў Беларусі: закрыццё храмаў, у тым ліку касцёла Святых Сымона і Алены ў Мінску, адмену рэгістрацыі грэка-каталіцкіх абшчын, дэпартацыю місіянераў”. Ён паведаміў, што “сотні тысяч беларусаў, уключаючы каталіцкіх і праваслаўных святароў, былі вымушаныя пакінуць краіну, ратуючыся ад рэпрэсій”.

Асобна Бяляцкі звяртаецца да нядаўняй энцыклікі папы Magnifica Humanitas, падкрэсліваючы яе цэнтральны тэзіс: непахіснасць і ўніверсальнасць правоў чалавека, заснаваных на чалавечай годнасці. “Для праваабаронцы, які заплаціў за сваю працу гадамі зняволення, гэтыя словы маюць асаблівую вагу: тое, што ён бачыў і перажыў за кратамі, было перш за ўсё сістэмнай спробай пазбавіць чалавека яго годнасці”, — гаворыцца ў паведамленні.

Значная частка паслання Бяляцкага прысвечаная “вайне Расіі супраць Украіны і ролі ў ёй рэжыму Лукашэнкі”. Праваабаронца называе беларускі рэжым “саўдзельнікам гэтай вайны і крыніцай нестабільнасці ў Еўропе”. Разам з тым ён падкрэслівае: “Беларускі народ супраць вайны, больш за 200 грамадзян Беларусі знаходзяцца за кратамі менавіта за крытыку вайны і салідарнасць з украінцамі. Беларусы хочуць жыць мірна і ў згодзе з суседзямі, аднак рэжым Лукашэнкі несамастойны, і захоўваецца небяспека прамога ўцягвання Беларусі ў вайну”.

На афіцыйных рэсурсах Ватыкана інфармацыі пра сустрэчу пакуль няма.

Паводле інфармацыі “Радыё Свабода” Леў XIV прыняў Бяляцкага з жонкай пасля агульнай аўдыенцыі, якая праходзіць штотыдзень па серадах на плошчы Святога Пятра і збірае тысячы вернікаў.

Падчас аўдыенцыі Бяляцкі знаходзіўся побач з іерархамі каталіцкай царквы ў непасрэднай блізкасці ад папы рымскага.

Аўдыенцыя папы рымскага — традыцыйная штотыднёвая сустрэча, падчас якой ён выступае з пропаведдзю, чытае малітвы і асабіста дабраслаўляе вернікаў.

8 траўня 2025 года Аляксандр Лукашэнка павіншаваў Льва XIV з абраннем папам рымскім і запрасіў яго ў Беларусь. 8 траўня 2026-га, віншуючы папу з гадавінай урачыстага пачатку пантыфікату, Лукашэнка не паўтарыў леташняга запрашэння.

69-гадовы амерыканскі кардынал Роберт Фрэнсіс Прэвост быў абраны кіраўніком Рымска-каталіцкай царквы пасля смерці папы Францішка 21 красавіка 2025 года.

Беларускія дэмакратычныя сілы пасля абрання Льва XIV папам рымскім выказалі надзею, што ён стане голасам падтрымкі для пераследуемых.

“Мы верым, што ваша слова можа стаць голасам падтрымкі для нашых палітвязняў, для іх сем’яў. Голасам для ўсіх, хто не страціў веры нават у самых цяжкіх умовах нашай рэчаіснасці”, — падкрэсліла дэмлідар Святлана Ціханоўская.

Надзею, што Леў XIV стане голасам сумлення і падтрымкі для тых, хто верыць у праўду і свабоду, выказаў Павел Латушка, віншуючы новага папу з абраннем на апостальскі пасад.

Дапаможны біскуп Пінскай дыяцэзіі Андрэй Зноска запрасіў папу рымскага Льва XIV наведаць Беларусь 1 кастрычніка 2025 года падчас аўдыенцыі на плошчы св. Пятра ў Ватыкане.

Пасля прэзідэнцкіх выбараў 2020 года адносіны дзяржавы і царквы ў Беларусі ўскладніліся ў сувязі з тым, што многія каталіцкія іерархі і вернікі адкрыта выступілі супраць хвалі гвалту і рэпрэсій, якія рушылі за масавымі пратэстамі супраць фальсіфікацыі вынікаў галасавання на карысць Лукашэнкі.