Беларусь на 5-м месцы на тэрыторыі былога СССР па росце спажывецкіх цэн у красавіку, на перадапошнім — з пачатку 2026 года
Ілюстрацыя: “Позірк”
23 траўня, Позірк. Беларусь з паказчыкам 2,47% заняла перадапошняе 13-е месца на тэрыторыі былога СССР па росце цэн за чатыры месяцы 2026 года, сведчыць праведзены “Позіркам“ аналіз даных нацыянальных органаў статыстыкі.
У першай сямёрцы Украіна (+4,9%), Літва (+4,7%), Арменія (+4,5%), Малдова (+4,49%), Грузія, Кыргызстан (па +4%) і Казахстан (+3,5%).
У студзені і студзені — лютым па росце цэн Беларусь была 12-й (0,46% і 1,03% адпаведна), у першым квартале — 13-й (1,62%), у красавіку з паказчыкам 0,84% — пятай пасля Малдовы (+1,76%), Грузіі (+1,7%), Украіны (+1,4%) і Арменіі (+1,3%).
Менш цэны павялічыліся за месяц у Казахстане, Эстоніі (па +0,8%), Кыргызстане (+0,7%), Латвіі, Літве, Таджыкістане, Узбекістане (па +0,6%), Азербайджане (+0,3%) і Расіі (+0,14%).
Даных па Туркменістане ў адкрытым доступе няма. Статыстыка не публікуецца больш за сем гадоў, асобныя лічбы зрэдку абвяшчаюць туркменскія чыноўнікі.
