Пракуратура Глускага раёна з пачатку года падала 70 заяў аб прызнанні інфармацыйнай прадукцыі “экстрэмісцкай“

21 траўня, Позірк. За мінулы перыяд 2026 года пракуратура Глускага раёна (Магілёўская вобласць) накіравала ў мясцовы суд 70 заяў “аб прызнанні інфармацыйнай прадукцыі экстрэмісцкімі матэрыяламі“, паведамляе Генеральная пракуратура.

“Аналіз публікуемага [у інтэрнеце] кантэнту паказаў, што ён накіраваны на папулярызацыю пратэстнай актыўнасці, утрымлівае абразы ў дачыненні да вышэйшых службовых асоб, загадзя ілжывыя звесткі аб становішчы Рэспублікі Беларусь, а таксама аб прававым статусе грамадзян, што вядзе да дыскрэдытацыі дзяржавы“, — сцвярджаецца ў рэлізе.

У прыватнасці, пракуратура ўстанавіла “старонку ў сацыяльнай сетцы “Фэйсбук“ з колькасцю падпісчыкаў звыш 98 тыс. чалавек“, дзе “размяшчаўся відэакантэнт аб дзейнасці <…> экстрэмісцкага фарміравання, а таксама экстрэмісцкія матэрыялы”.

Пры вывучэнні ўліковага запісу жыхара раёна ў адной з сацыяльных сетак “устаноўлены факт размяшчэння ім відэаролікаў, якія ўтрымлівалі паклёп у дачыненні да кіраўніка дзяржавы“, рапартуе ведамства.

У выніку суд Глускага раёна прыгаварыў мужчыну да двух гадоў абмежавання волі без накіравання ў папраўчую ўстанову адкрытага тыпу па ч. 2 арт. 367 Крымінальнага кодэкса.

У 2025 годзе паводле патрабаванняў пракурораў прызнана “экстрэмісцкімі“ каля 1,3 тыс. інфармацыйных матэрыялаў, паведамляла раней Генпракуратура.

У рамках грамадзянскага судаводства па патрабаванням пракурораў спагнана каля 78 млн рублёў.

У пералікі “экстрэмісцкіх матэрыялаў“ і “экстрэмісцкіх фарміраванняў” унесеныя практычна ўсе недзяржаўныя грамадска-палітычныя СМІ і іх акаўнты ў сацсетках.