Ліквідацыя ёдадэфіцыту за 10 гадоў удвая знізіла захворванне валлём ў дзяцей — эндакрынолаг
21 траўня, Позірк. У выніку рэалізацыі нацыянальнай стратэгіі ліквідацыі ёдадэфіцыту ў Беларусі больш чым у два разы за дзесяць гадоў зменшыўся паказчык першаснага захворвання эндэмічным валлём на 100 тыс. дзіцячага насельніцтва. Пра гэта паведаміла галоўны пазаштатны дзіцячы эндакрынолаг Міністэрства аховы здароўя, дырэктар Рэспубліканскага навукова-практычнага цэнтра дзіцячай анкалогіі, гематалогіі і імуналогіі Анжаліка Солнцева на прэс-канферэнцыі 21 траўня.
Калі ў 2015 годзе гэты паказчык быў 195, то ў 2025-м — 88. Паводле слоў Солнцавай, менавіта паказчык частаты такога захворвання з’яўляецца крытэрам добрай забяспечанасці ёдам.
На пачатак 2026 года ў структуры захворванняў шчытападобнай залозы ў дзяцей пераважала эндэмічнае дыфузнае валлё, з гэтым дыягназам на дыспансерным уліку было больш за 7.500 дзяцей.
