13 траўня, Позірк. Аб адсутнасці “рызык фарміравання патэнцыялу” для распаўсюджвання ў Беларусі хантавіруснай інспекцыі заявіла 13 траўня Міністэрства аховы здароўя.
Сцвярджаецца, што на тэрыторыі Еўропы і Азіі няма “арэала распаўсюджвання пераносчыка Andes virus — даўгахвостага рысавага хамячка“.
Мінздароўя паведаміла, што “трымае на кантролі развіццё сітуацыі, звязанай з успышкай хантавіруснай інфекцыі на круізным лайнеры MV Hondius, які накіроўваўся з Аргенціны ў Каба-Вэрдэ”.
“Сярод пасажыраў лайнера выяўленыя выпадкі хантавіруснага кардыё-пульманальнага сіндрому (ХПС), выкліканага спецыфічным прадстаўніком сямейства хантавірусаў Andes virus, для якога характэрная абмежаваная перадача ад чалавека да чалавека пры вельмі цесным і працяглым кантакце з хворым“, — гаворыцца ў паведамленні.
“Гэты від віруса <…> распаўсюджаны ў Паўднёвай, Цэнтральнай і Паўночнай Амерыцы, асноўным пераносчыкам якога з’яўляецца даўгахвосты рысавы хамячок, які жыве ў Аргенціне і Чылі”, — удакладніла ведамства.
Адзначаецца, што хантавірусы — гэта “група вірусаў, якія перадаюцца чалавеку ад грызуноў, галоўным чынам пры ўдыханні часціц заражаных вылучэнняў“. Хантавірусная інфекцыя “можа прыводзіць да вострай дыхальнай недастатковасці або паразы нырак, у тым ліку са смяротным зыходам“.
“У мэтах недапушчэння завозу хантавіруса Andes на тэрыторыю Рэспублікі Беларусь у пунктах пропуску на дзяржаўнай мяжы ўзмоцнены санітарна-каранцінны кантроль прыбываючых асоб“, — падкрэсліваецца ў рэлізе.
Судна MV Hondius адплыло з Аргенціны ў пачатку красавіка, каб пачаць падарожжа праз Атлантыку. Паводле апошніх звестак, на ім было выяўлена восем пацверджаных і меркаваных выпадкаў заражэння хантавірусам, тры чалавекі памерлі — шлюбная пара з Нідэрландаў і грамадзянін Германіі.
