18 мігрантаў пранікла ў Літву з Беларусі праз падземны тунэль

8 траўня, Позірк. Аб затрыманні 18 нелегальных мігрантаў паведаміла 8 траўня Служба аховы дзяржаўнай мяжы Літвы (САДМ).

Адзначаецца, што замежнікі праніклі ў краіну праз тунэль, выкапаны на мяжы пад загародай у Варэнскім раёне.

“Усе гэтыя мужчыны, якія прадставіліся грамадзянамі Афганістана і Шры-Ланкі, былі вернутыя ў Беларусь”, — гаворыцца ў паведамленні.

Удакладняецца, што мігранты былі выяўленыя з дапамогай сістэмы відэаназірання. Іх затрымалі ў лесе памежнікі, “уключаючы кінолагаў з сабакамі”.

Таксама гаворыцца пра затрыманне двух грамадзян Украіны, іх падазраюць у намеры “забраць семярых імігрантаў, якія незаконна трапілі ў Літву“.

Украінцы 41 і 33 гадоў перасоўваліся на аўтамабілі “Аўдзі А6”, у Літве знаходзяцца легальна, адзначае САДМ. У дачыненні да іх распачатае дасудовае расследаванне. “Закон прадугледжвае штраф або пазбаўленне волі на тэрмін да 8 гадоў за падобнае крымінальнае злачынства”, — падкрэслівае памежная служба.

Звяртаецца ўвага, што гэта другі выпадак у 2026 годзе, калі мігранты спрабавалі пранікнуць у Літву праз тунэлі. Папярэдні раз гэта здарылася 6 красавіка.

“Падобныя тунэлі рыюцца, і мігранты спрабуюць прапаўзці па іх у Літву відавочна не без ведама беларускіх службовых асоб”, — адзначае САДМ.

Паводле звестак ведамства, з пачатку 2026 года ў Літву з Беларусі спрабаваў трапіць 731 мігрант, у Польшчу — 146, у Латвію — 2.475.

Гл. таксама:

Нелегальныя мігранты больш за 40 дзён запар спрабуюць трапіць з Беларусі ў Латвію