Праз закрыццё маскоўскага аэрапорта Унукава ранкам 7 траўня не вылецелі два рэйсы “Белавія”

7 траўня, Позірк. Праз часова закрытае неба над часткай Масквы ранкам 7 траўня былі скасаваныя два рэйсы “Белавія”, сведчыць інфармацыйнае табло на сайце нацыянальнага аэрапорта Мінск.

У прыватнасці, у 6:45 не вылецеў борт з беларускай сталіцы ў маскоўскі аэрапорт Унукава, а таксама з гэтага аэрапорта ў Мінск — у 10:35.

Запланаваны на 12:40 рэйс у аэрапорт Унукава адбудзецца — ідзе пасадка пасажыраў.

Варта адзначыць, што рэйсы з Мінска ў маскоўскія аэрапорты Шарамеццева і Дамадзедава вылецелі паводле графіку — у 7:40, 11:40, а таксама 11:20 адпаведна.

З Шарамеццева ў Мінск самалёты “Белавія” вярнуліся своечасова — у 1:15 і 11:15.

Ранкам 7 траўня прэс-служба аэрапорта Унукава паведаміла, што аб’ект часова закрыты “ў мэтах забеспячэння бяспекі палётаў”. Верагодна, гэта звязана з беспілотнай актыўнасцю. Расійскія ўлады і СМІ абвінавацілі Украіну ў нападзе дронамі.