Латвійскія памежнікі паведамілі пра агрэсію з боку парушальніка, які перакрочыў мяжу з Беларуссю

6 траўня, Позірк. Пра зафіксаваны 3 траўня выпадак агрэсіі з боку парушальніка, які незаконна перакрочыў з боку Беларусі, паведаміла 6 траўня Дзяржаўная памежная ахова (ДПА) Латвіі.

Адзначаецца, што парушальнік “не рэагаваў на загад памежнікаў вярнуцца назад, паводзіў сябе агрэсіўна, кідаў камяні і пагражаў памежнікам“. Пасля ўжывання супрацоўнікамі ДПА спецыяльных сродкаў ён “вярнуўся ў краіну, з якой прыбыў“.

Таксама паведамляецца, што ў выходныя дні, з 30 красавіка па 4 траўня, за перавозку асоб, якія незаконна перасеклі дзяржаўную мяжу, памежнікі ў Аўгшдаўгаўскім і Краслаўскім краях затрымалі чатырох чалавек і спынілі спробу незаконнага перасячэння дзяржаўнай мяжы 28 асобамі.

Сярод затрыманых — грамадзяне Латвіі, Малдовы і Эстоніі, у аўтамабілях пад кіраваннем якіх знаходзіліся нелегальныя мігранты. У дачыненні да кіроўцаў распачатая крымінальная вытворчасць.

ДПА заклікала жыхароў краіны не ўдзельнічаць у незаконнай дзейнасці і нагадала, што за ўдзел у ёй прадугледжаны суровыя пакаранні: за арганізацыю і садзейнічанне незаконнаму перамяшчэнню асоб правапарушальнікі могуць быць пакараныя пазбаўленнем волі на тэрмін ад двух да дзесяці гадоў, з канфіскацыяй маёмасці або без такой, а таксама з прабацыйным наглядам тэрмінам да трох гадоў або без яго.

Латвія ў 2026 годзе з’яўляецца асноўнай мэтай нелегальных мігрантаў, якія спрабуюць трапіць у Еўрасаюз праз Беларусь. 5 траўня, паводле звестак ДПА, прадпрынята 50 спробаў незаконнага пераходу мяжы, з пачатку месяца, як сведчыць аналіз “Позірку“, — 266, з пачатку года — 2.288.