Праз моцны вецер зноў пашкоджаныя аўтамабілі і будынкі, упала больш за 60 дрэў

26 красавіка, Позірк. Восем легкавых аўтамабіляў пашкоджана праз моцны вецер 26 красавіка, паведамляе МНС.

У Мінску пацярпелі тры машыны: на дзве ўпалі элементы аздаблення фасада жылога дома, на адзін — дрэва.

Чатыры аўтамабілі пашкоджана ў Гродзенскай вобласці, адзін — у Брэсцкай (непасрэдныя прычыны не пазначаныя).

У Брэсцкай вобласці і Мінску супрацоўнікі МНС “надавалі дапамогу па зняцці пашкоджаных элементаў канструкцый будынкаў і збудаванняў“.

У сталіцы, а таксама ў Брэсцкай, Віцебскай, Гродзенскай і Мінскай абласцях падраздзяленні МНС больш за 60 разоў “рэагавалі для распілоўкі і ўборкі паваленых дрэў“.

Паводле аператыўнай інфармацыі ведамства, людзі не пацярпелі.

Аб моцным ветры парывамі да 24 м/c (86,4 км/г, 9 з 12 балаў паводле шкалы Бафорта, катэгорыя “шторм“. — “Позірк“.) напярэдадні паведаміў Белгідрамет. Папярэджанне дзейнічае 26 і 27 красавіка.

Моцны вецер прынёс прыкметнае пахаладанне. Днём 26 красавіка ішоў снег.

Уначы 27, 28 і 29 красавіка чакаюцца замаразкі да мінус 3-4 градусаў.

23 красавіка ад наступстваў моцнага ветру пацярпелі два чалавекі — 13-гадовая дзяўчынка і 60-гадовы мужчына, а таксама аўтамабілі і будынкі. Урон быў нанесены 16 населеным пунктам.

У той дзень у Слаўгарадзе парывы ветру дасягнулі 29 м/с (104,4 км/г, 11 з 12 балаў паводле шкалы Бафорта, катэгорыя “жорсткі шторм“).