Па ўсёй краіне ўведзеныя абмежаванні на наведванне лясоў

24 красавіка, Позірк. Ва ўсіх рэгіёнах Беларусі дзейнічаюць абмежаванні на наведванне лясоў, вынікае з інтэрактыўнай карты Міністэрства лясной гаспадаркі.

Суткамі раней у “зялёнай зоне” заставалася 15 раёнаў (10 — у Магілёўскай, 5 — у Гомельскай абласцях).

Абмежаванні азначаюць, што ў лясы нельга заязджаць на аўтамабілі і разводзіць там вогнішчы, аднак даступныя пешыя прагулкі, збор ягад і грыбоў (пры забароне наведванне лясоў цалкам выключана).

На 10 красавіка 2026 года падраздзяленнямі Міністэрства па надзвычайных сітуацыях зафіксаваны 81 лясны пажар, тры тарфяных, 2.283 гарэнні травы і кустоў, паведаміў на прэс-канферэнцыі начальнік цэнтра ўзаемадзеяння з грамадскасцю і СМІ ведамства Максім Клачко.

Асноўнай прычынай узнікнення пажараў на прыродзе ён назваў “так званы чалавечы фактар”. “Гэта парушэнне правілаў пажарнай бяспекі пры развядзенні вогнішчаў, спальванне сухой травы на корані, непатушаная цыгарэта. Ёсць выпадкі, калі кінутая проста прамасленая рыззё таксама магла стаць крыніцай узгарання і надзвычайнай сітуацыі. Нярэдкія выпадкі, калі такія пажары адбываюцца праз дзіцячае свавольства з агнём”, — падкрэсліў чыноўнік.

23 красавіка Мінлясгас паведаміў аб буйным лясным пажары на тэрыторыі Пінскага лясгаса. Згарэла не менш за 50 га леса.