Латушка: Мы пабудавалі палітычны суб’ект за мяжой
6 сакавіка, Позірк. Падтрымка дэмакратычнай трансфармацыі Беларусі сёння — гэта “прамая інвестыцыя ў бяспеку ўсёй Еўропы заўтра”, заявіў намеснік кіраўніцы Аб’яднанага пераходнага кабінета (АПК), кіраўнік Народнага антыкрызіснага ўпраўлення Павел Латушка падчас сустрэчы “Палітычная сітуацыя ў Беларусі і рэгіянальныя перспектывы” ў межах 6-га пасяджэння Кансультатыўнай групы ЕС — Беларусь 6 сакавіка ў Бруселі.
Як паведамляе прэс-служба АПК, Латушка прадставіў доўгатэрміновую стратэгію Кабінета, якая складаецца з трох галоўных элементаў: развіццё сістэмы палітычных інстытутаў, эфектыўны ціск на рэжым з мэтай змены яго палітыкі і рэалізацыя канцэпцыі круглага стала па перамовах з яго прадстаўнікамі.
”Упершыню ў сучаснай гісторыі мы стварылі паўнавартасную сістэму палітычных інстытутаў. <…> Мы не ператварыліся ў сетку разрозненых ініцыятыў. Мы пабудавалі палітычны суб’ект за мяжой”, — адзначыў палітык.
Павозде яго, палітычны ўплыў дэмакратычных інстытутаў пацвярджаецца рэакцыяй уладаў, які прызнаў іх ”экстрэмісцкімі і тэрарыстычнымі арганізацыямі”, выкарыстоўвае экстэрытарыяльны пераслед праз завочныя прысуды і актыўную працу спецслужбаў.
”Рэжым выкарыстоўвае дэзінфармацыю і дыскрэдытацыю, стварае пагрозы для нашага жыцця, — дадаў экс-дыпламат. — Гэта беспрэцэдэнтны ціск. Рэжым выдаткоўвае велізарныя рэсурсы на барацьбу з намі. Яны хочуць знішчыць гэтую палітычную альтэрнатыву. Усё гэта даказвае: мы — рэальны фактар і суб’ект палітыкі, які немагчыма ігнараваць”.
АПК, нагадаў Латушка, разглядае эканамічныя і персанальныя санкцыі не як фармальнасць, а як “моцны і прагматычны рычаг з мэтай прымусіць рэжым змяніць сваю палітыку”: “Мы ствараем умовы, пры якіх пошук палітычнага выйсця становіцца адзіным рацыянальным сцэнарыем”.
Паводле спікера, прамыя перамовы паміж міжнароднай супольнасцю і рэжымам не спрацуюць, ”спробы абысці беларускае грамадства і дэмакратычныя сілы не вырашаць крызіс”, унутраная трансфармацыя ”немагчымая без унутранага дыялогу і ўключэння грамадства”.
Мінулы раз паседжанні кансультатыўнай групы ЕС — Беларусь адбываліся ў чэрвені 2025 года. Згаданая кансультатыўная група створаная для афіцыйнага дыялогу паміж беларускай дэмакратычнай супольнасцю і структурамі Еўрасаюза.
Мэта гэтай структуры заключаецца ў тым, каб каардынаваць падтрымку беларускіх дэмсіл, грамадзянскай супольнасці і абмяркоўваць будучыню дэмакратычнай Беларусі. Сярод удзельнікаў з беларускага боку — прадстаўнікі Аб’яднанага пераходнага кабінета, Каардынацыйнай рады і іншых суб’ектаў грамадзянскай супольнасці.
Ключавым фактарам у вызначэнні будучыні Беларусі застаецца пазіцыя яе народа — Ціханоўская
6 сакавіка, Позірк. Будучыня Беларусі ў значнай ступені будзе залежаць ад геапалітычнай сітуацыі і развіцця вайны ва Украіне, аднак ключавым фактарам застаецца пазіцыя беларускага народа, заявіла дэмакратычны лідар Святлана Ціханоўская 6 сакавіка ў Бруселі на чарговым пасяджэнні Кансультатыўнай групы ЕС …
