У Беларусі два гады запар зніжаецца колькасць пацярпелых ад “зімовых” траўмаў
8 студзеня, Позірк. У Беларусі два гады запар зніжаецца колькасць людзей, якія пацярпелі ад галалёдных і халадовых траўмаў, паказаў праведзены “Позіркам” аналіз інфармацыі Міністэрства аховы здароўя.
У прыватнасці, з 26 лістапада 2025 года па 11 студзеня 2026-га (47 дзён) было 3.681 пацярпелых, з 21 лістапада 2024 года па 7 студзеня 2025-га (таксама 47 дзён) — 4.561, з 21 лістапада 2023 года па 8 студзеня 2024-га (48 дзён) — 9.455. Традыцыйна ведамства пачынае адлік “ад пачатку зімовага сезона (ад першых замаразкаў)”.
Сёлета ўзімку больш за ўсё пацярпелых зарэгістравана ў Магілёўскай вобласці — 708, з іх 146 шпіталізавана. Год таму па гэтым рэгіёне паказчыкі складалі 931 і 128, два гады таму — 1.677 і 210.
Далей ідзе Віцебская вобласць, якая была лідарам два гады запар паводле колькасці тых, хто звярнуўся па дапамогу (647 і 93, 1.483 і 91, 1.978 і 156), затым — Гомельская (570 і 72, 698 і 53, 1.291 і 100), Мінская (564 і 84, 622 і 59, 1.754 і 162), Мінск (452 і 45, 311 і 45, 629 і 72), Гродзенская вобласць (405 і 90, 189 і 51, 699 і 129) і Брэсцкая (335 і 92, 327 і 45, 1.427 і 158).
Як і раней, абсалютная большасць тых, хто звярнуўся, атрымала галалёдныя траўмы, сёлета ўзімку такіх 3.432 (2.852 дарослых і 580 дзяцей). Паведамляецца, што 87 дарослых і 222 дзіцяці атрымалі траўмы пры катанні на цюбінгах, ледзянках, санках і г.д.
Мінздароўя заклікае ўсіх грамадзян “пры выхадзе на вуліцу быць пільнымі і правільна апранацца”, жанчын — “адмовіцца ўзімку ад высокіх абцасаў”, бацькоў — “вучыць дзяцей выконваць правілы бяспекі на горках”.
