Астапенка абраны кіраўніком дэлегацыі беларускіх дэмсіл у ПАСЕ

27 жніўня, Позірк. Кіраўніком дэлегацыі беларускіх дэмакратычных сіл у Парламенцкай асамблеі Савета Еўропы (ПАСЕ) 26 жніўня абраны член фракцыі “Кааліцыя Латушкі і рух “За Свабоду” ў Каардынацыйнай радзе (КР) і прадстаўнік Аб’яднанага пераходнага кабінета (АПК) па міжнароднай і еўрапейскай супрацы Уладзімір Астапенка.

КР зацвердзіла склад дэлегацыі для “прадстаўніцтва беларускіх нацыянальных інтарэсаў” на палях ПАСЕ. У якасці дэлегатаў у яе таксама ўвайшлі Павел Латушка (адзін з лідараў згаданай фракцыі, намеснік кіраўніцы АПК, кіраўнік Народнага антыкрызіснага ўпраўлення) і Ксенія Луцкіна (член фракцыі “Еўрапейскі выбар”), у якасці намеснікаў — Яўген Андрэйчык (“Наступ”), Аляксандра Мамаева (пазафракцыйны член КР) і Ганна Скрыган (“Аб’яднаная грамадзянская платформа”).

Адзначаецца, што на першым пасяджэнні дэлегацыі былі абмеркаваныя “прыярытэты і планы дзеянняў, размеркаваныя напрамкі працы ў камітэтах і палітычных групах ПАСЕ”.

Спікер КР Арцём Брухан накіраваў старшыні ПАСЕ Петры Байр афіцыйнае паведамленне пра сфармаваны склад дэлегацыі. У лісце ён таксама выказаў упэўненасць у тым, што “супраца са структурамі Савета Еўропы будзе ўзмацняцца і пашырацца на карысць незалежнай, дэмакратычнай і Еўрапейскай Беларусі”.

25 студзеня 2024 года ПАСЕ прыняла рэзалюцыю 2530, у якой сярод іншага пастанавіла забяспечыць удзел “прадстаўнічай дэлегацыі беларускіх дэмакратычных сіл” у працы камітэтаў і сетак асамблеі. 6 верасня таго ж года Бюро арганізацыі запрасіла беларускія дэмсілы сфармаваць дэлегацыю і вызначыла механізм яе працы.

ПАСЕ — кансультатыўны орган, які складаецца з прадстаўнікоў парламентаў усіх дзяржаў-членаў, з’яўляецца найстарэйшым у Еўропе органам міжпарламенцкай супрацы.

16 верасня 1992 года асамблея надала статус “спецыяльна запрошанага” Вярхоўнаму Савету Беларусі 12-га склікання.

12 сакавіка 1993 года Мінск падаў заяўку на ўступленне ў Савет Еўропы, аднак у студзені 1997-га пасля правядзення ў Беларусі рэферэндуму (24 лістапада 1996-га) аб змяненні Канстытуцыі Бюро ПАСЕ прыпыніла статус новага двухпалатнага парламента — Нацыянальнага сходу. Пасля гэтага разгляд заяўкі быў адкладзены.

Да вайны, якую Расія развязала супраць Украіны на пачатку 2022 года, Беларусь была адзінай еўрапейскай дзяржавай (за выключэннем Косава, чыю незалежнасць прызналі 100 са 193 дзяржаў — членаў ААН), якая не ўваходзіла ў склад Савета Еўропы. 28 лютага 2023 года быў прыняты закон “Аб спыненні дзеяння ў дачыненні да Расійскай Федэрацыі міжнародных дагавораў Савета Еўропы”.