У Маладзечне дзяўчына памерла пасля татуявання ў хатніх умовах

7 кастрычніка, Позірк. 21-гадовая жыхарка Маладзечна (Мінская вобласць) памерла ў выніку заражэння крыві і адмовы органаў пасля зробленай у хатніх умовах татуіроўкі, паведаміў 7 кастрычніка Дзяржаўны камітэт судовых экспертыз (ДКСЭ).

Дзяўчына была экстрана дастаўленая ў Маладзечанскую цэнтральную раённую бальніцу напрыканцы жніўня, дзе памерла праз суткі.

Паводле звестак ДКСЭ, праверка паказала, што дзяўчына “ў хатніх умовах зрабіла татуіроўку ў галіне левага перадплечча”, праз некалькі дзён пасля працэдуры “ў яе ўзнялася высокая тэмпература, а таксама ўзніклі пачырваненне і ацёк у раёне татуіроўкі”.

“Пры правядзенні судова-медыцынскай экспертызы высветлена, што смерць дзяўчыны наступіла ў выніку распаўсюджанага запаленчага працэсу ў арганізме, то бок сепсісу, які прывёў да шматорганнай функцыянальнай недастатковасці”, — гаворыцца ў паведамленні.