З сакавіка па жнівень Карпушонак спампавала больш за 70 рабочых дакументаў — Каардынацыйная рада

4 верасня, Позірк. З сакавіка па жнівень гэтага года дэлегат Каардынацыйнай рады (КР) Вольга Карпушонак спампавала з агульнага сховішча файлаў больш за 70 рабочых дакументаў, паведаміла арганізацыя 4 верасня.

Адзначаецца, што “гэтыя дакументы дасяжныя для ўсіх дэлегатаў КР і не ўтрымліваюць нейкіх сакрэтных даных, аднак актыўнасць нетыповая: да сакавіка 2025 года Вольга не спампавала ніводнага дакумента, але пасля сакавіка — спампоўвала ўсе дакументы, якія публікаваліся для чальцоў КР“.

Паведамляецца, што доступ Карпушонак да рэсурсаў КР заблакаваны да ўдакладнення сітуацыі з ёй.

30 жніўня дэлегат Каардынацыйнай рады (спіс “Хопіць баяцца!”), экс-адвакат Карпушонак абвінаваціла намесніка кіраўніка Аб’яднанага пераходнага кабінета, кіраўніка Народнага антыкрызіснага ўпраўлення Паўла Латушку ў сексуальных дамаганнях.

1 верасня яна паведаміла пра гатоўнасць “пацвярджаць свае словы канкрэтнымі фактамі”.

Латушка назваў гэтыя абвінавачанні “хлуснёй і паклёпам“. Ён паведаміў пра намер звярнуцца ў праваахоўныя органы з заявай аб паклёпе, а таксама падрыхтаваць грамадзянскі пазоў да Карпушонак аб абароне гонару і годнасці і патрабаваць абвяржэння.

У НАУ заявілі, што публікацыя “чарговага паклёпу Вольгі Карпушонак“ — спецаперацыя КДБ, накіраваная на дыскрэдытацыю Латушкі.

3 верасня ў сеціве быў размешчаны скан ліста нібыта ад імя Карпушонак прэзідэнту Парламенцкай асамблеі Савета Еўропы (ПАСЕ), у якім яна сцвярджае, што “стала ахвярай сексуальных дамаганняў“ з боку Латушкі. У адказ той заявіў, што дзеянні Карпушонак накіраваныя на ліквідацыю КР і пазбаўленне яе міжнароднага прызнання. Латушка і Карпушонак з’яўляюцца членамі дэлегацыі КР у ПАСЕ.

У цяперашні час месцазнаходжанне Карпушонак невядомае.