Лукашэнка запатрабаваў ад сеткі Маk.by цалкам перайсці на беларускую бульбу

28 жніўня, Позірк. Поўнага пераходу на беларускую бульбу запатрабаваў Аляксандр Лукашэнка ад сеткі Mak.by падчас рабочай паездкі ў Кіраўскі раён (Магілёўская вобласць).

“Каб у Mak.by з 1 кастрычніка не было ніводнага кавалка імпартнай бульбы. І катлеты. Там павінна быць беларускае. Што вы гэтую гадасць амерыканскую людзям падсоўваеце?” — цытуе Лукашэнку неафіцыйны тэлеграм-канал яго прэс-службы.

Пры гэтым, як адзначаецца, чыноўнікі “далажылі” свайму кіраўніку, што ўжо са жніўня ўся бульба ў Маk.by — “з Талачына”.

Гаворачы ў цэлым пра ўраджай бульбы, Лукашэнка заявіў, што сёлета ён будзе “дастатковым”, паколькі было прынята рашэнне аб павелічэнні плошчаў яго вырошчвання.

Як заяўляецца, ён “папярэдзіў, што сёлета напэўна захаваецца значны попыт на бульбу за межамі краіны, у тым ліку ў суседняй Расіі”.

Лукашэнка заклікаў пастаўшчыкоў бульбы “адладзіць выразныя сувязі з гандлёвымі сеткамі, каб яны своечасова пастаўлялі бульбу ў крамы і каб не паўтарылася сітуацыя вясны гэтага года”.

“Трэба глядзець, каб не гандлёвыя сеткі вамі кіравалі, а вы імі. Таргашы павінны падлучацца на ўсю катушку”, — сказаў ён.

У паведамленні падкрэсліваецца, што аб’екты гандлю на 95% забяспечаныя ранняй бульбай, яе кошт у сярэднім складае 1,3 рубля за кілаграм.

У лістападзе 2022 года беларускае прадстаўніцтва сеткі рэстаранаў “Макдональдс” паведаміла аб хуткім сыходзе з беларускага рынку, а затым — пра тое, што на працягу некалькіх тыдняў рэстараны пачнуць працаваць пад расійскім брэндам “Смачна — і кропка”.

Пасля рэстараны былі перайменаваныя ў Mak.by і працуюць пад гэтай назвай.

18 лістапада 2022 года Лукашэнка заклікаў “не ахаць і не охаць” з нагоды сыходу “Макдональдса” з Беларусі.

“Я яшчэ раз вас заклікаю: харчуйцеся, спажывайце сваё, не кідайцеся на заморскае, — сказаў ён. — Гэта сёння актуальна гучыць, бо некаторыя, асабліва сярод моладзі, ды і, напэўна, сярэдняга ўзросту, а можа, і старэйшага, сталі ахаць і охаць: “Ах, “Макдональдс” сыходзіць”. Я думаю: дзякуй богу, што сыходзіць”.

Пры гэтым Лукашэнка падкрэсліў, што месца “Макдональдса” “павінны заняць беларусы, ніхто іншы”.

12 снежня падчас разгляду кадравых пытанняў ён назваў “Макдональдс” сярод нацыяналізаваных прадпрыемстваў.

18 студзеня гэтага года Лукашэнка заявіў, што ў Беларусі “цудоўна разабраліся” з наступствамі сыходу “Макдональдса”: людзі з задавальненнем ходзяць у гэтыя рэстараны, падкрэсліў ён.

У снежні мінулага года ў Міністэрстве антыманапольнага рэгулявання і гандлю (МАРГ) назвалі Mak.by, “буйной беларускай сеткай” з нацыянальнай кухняй.

Дэфіцыт бульбы вясной стаў прадметам неаднаразовых разбіральніцтваў на нарадах з удзелам Лукашэнкі.