У пятую гадавіну прэзідэнцкіх выбараў-2020 Германія і Польшча заклікалі вызваліць усіх палітвязняў у Беларусі

Ілюстрацыя: pixabay.com

9 жніўня, Позірк. Вызваліць усіх палітвязняў заклікала беларускі рэжым знешнепалітычнае ведамства Германіі ў пятую гадавіну прэзідэнцкіх выбараў-2020.

“У Беларусі за кратамі па-ранейшаму больш за 1.100 палітвязняў — праз пяць гадоў пасля сфальсіфікаваных прэзідэнцкіх выбараў. Яны былі жорстка пакараныя за тое, што выступалі ў падтрымку свабоды, дэмакратыі і правоў чалавека“, — адзначаецца ў паведамленні МЗС ФРГ.

МЗС Польшчы, “кіруючыся ідэаламі свабоды і салідарнасці“, “пацвярджае сваю падтрымку ўсіх грамадзян Беларусі, якія імкнуцца да аднаўлення вяршэнства права, дэмакратыі і павагі правоў чалавека на сваёй радзіме“. Варшава заклікала беларускія ўлады “вярнуцца да выканання абавязацельстваў, узятых у сувязі з сяброўствам у ААН і АБСЕ, і вызваліць усіх вязняў сумлення, у тым ліку Анджэя Пачобута“. “Гэты жэст будзе спрыяць аднаўленню даверу паміж краінамі Цэнтральнай і Усходняй Еўропы і стабільнасці ва ўсім рэгіёне“, — гаворыцца ў заяве.

Польскі МЗС падкрэслівае, што Беларусь “належыць да еўрапейскай сям’і народаў і шлях да яе ўстойлівага развіцця і росквіту ляжыць перш за ўсё праз Еўропу“.