Дарадца Ціханоўскай абмеркаваў з уладамі ЗША прызначэнне спецпасланніка па Беларусі
Дарадца Ціханоўскай Дзяніс Кучынскі і намеснік памочніка дзяржсакратара ЗША Крыстафер Сміт
18 ліпеня, Позірк. Важнасць працы беларускага падраздзялення амбасады ЗША ў Вільнюсе і магчымасць назначэння амерыканскага спецпасланніка па Беларусі абмеркаваў у Белым доме і Дзярждэпартаменце ЗША дарадца Святланы Ціханоўскай па дыпламатычных пытаннях Дзяніс Кучынскі, паведаміла 18 ліпеня прэс-служба дэмакратычнага лідара.
Адзначаецца, што ў Белым доме Кучынскі сустрэўся з намеснікам дарадцы па нацыянальнай бяспецы прэзідэнта ЗША — дарадцам па нацыянальнай бяспецы віцэ-прэзідэнта Эндзі Бэйкерам, у Дзярждэпе — са спецыяльным памочнікам па пытаннях Еўропы намесніка дзяржсакратара Крыстаферам Рэнда і намеснікам памочніка дзяржсакратара, які адказвае за Беларусь, Крыстаферам Смітам.
На гэтых сустрэчах, як сцвярджаецца, абмяркоўваліся “крокі для вызвалення” беларускіх палітвязняў, падтрымка грамадзянскай супольнасці і медыя, працяг стратэгічнага дыялогу паміж ЗША і дэмсіламі Беларусі.
Адбыліся кансультацыі з дарадцамі асобных амерыканскіх кангрэсменаў і сенатараў, бакі абмеркавалі правядзенне сёлета ў Кангрэсе ЗША слуханняў з удзелам Святланы і Сяргея Ціханоўскіх. На сустрэчы з прадстаўнікамі камітэта Сената па міжнародных справах гаворка ішла пра палітыку ў дачыненні да Беларусі, а таксама пра магчымасці падтрымкі ініцыятыў у галіне дэмакратыі і правоў чалавека.
Дарадца Ціханоўскай таксама ўзяў удзел у Форуме па бяспецы ў Аспене (штат Каларада).
Пра візіт Кучынскага ў ЗША прэс-служба Ціханоўскай паведамляла 16 ліпеня.
