Абвешчаны збор сродкаў на аперацыю пацярпеламу ў аварыі ў Батумі беларусу

17 ліпеня, Позірк. Беларуская дыяспара Аджарыі (Грузія) абвясціла збор сродкаў на аперацыю 26-гадоваму беларусу Артуру Лашакоўскаму (імя пазначанае ў рэквізітах), які пацярпеў у дарожна-транспартным здарэнні ў цэнтры Батумі.

Раней “Позірк” паведамляў, што мужчына атрымаў цяжкія траўмы ў аварыі, якая здарылася ў ноч на 16 лютага. Яго жонка, 25-гадовая беларуска, загінула. Пара праводзіла сястру дзяўчыны, якая ляцела ў Мінск. На зваротным шляху ў таксі, на якім ехалі муж і жонка, урэзаўся іншы аўтамабіль.

У дыяспары адзначаюць, што “цяпер хлопец жыве з цяжкімі наступствамі той аварыі: вымушаны насіць шыйны гарсэт, пакутуе ад боляў і вельмі абмежаваны ў рухах”. “Вярнуцца да нармальнага жыцця яму можа дапамагчы аперацыя. Неўролагі кажуць, што чым хутчэй яна будзе зробленая, тым больш шанцаў у 27-гадовага хлопца аднавіць здароўе”, — гаворыцца ў абвестцы пра збор сродкаў.

Паводле папярэдняй ацэнкі, заснаванай на разліках грузінскіх урачоў, кошт лячэння складае прыкладна 9.000 лары (больш за 3,3 тыс. долараў).