Міліцыя спыніла чарговую спробу вывезці з Беларусі ў Расію партыю металу
21 чэрвеня, Позірк. Больш за 18 тон лому каляровых і чорных металаў на суму 56 тыс. рублёў не дазволілі вывезці з Беларусі ў Расію супрацоўнікі аддзела па барацьбе з эканамічнымі злачынствамі і Дзяржаўтаінспекцыі Мінскай вобласці.
Паводле інфармацыі прэс-службы МУС, аўтамабіль “Сканія” з паўпрычэпам, у якім знаходзіўся груз без суправаджальных дакументаў, спынілі ў Маладзечанскім раёне.
Кіроўца — 33-гадовы жыхар Маладзечна — патлумачыў, што збіраў яго на тэрыторыі Вілейскага раёна, каб пасля прадаць у РФ.
“У дачыненні да мужчыны складзены адміністрацыйны пратакол за незаконную прадпрымальніцкую дзейнасць. Яму пагражае буйны штраф і канфіскацыя прадмета правапарушэння”, — заявіла прэс-служба міністэрства.
Праведзены “Позіркам” аналіз паведамленняў МУС паказаў, што гэта шосты ад пачатку года выпадак прадухілення спробы незаконна вывезці метал з Беларусі ў Расію.
Папярэдні раз гэта адбылося ў сярэдзіне траўня. Тады 35-гадовы жыхар Мінска спрабаваў вывезці з краіны каля 7 т адкідаў чорных і каляровых металаў на агульную суму больш як 14 тыс. рублёў.
Два эпізоды зафіксавалі ў сакавіку. У першым выпадку міліцыя спыніла жыхара Лунінецкага раёна (Брэсцкая вобласць), які меў намер вывезці ў РФ больш за 11 т лому алюмінію, медзі і латуні без дакументаў на суму каля 65 тыс. рублёў. У другім — жыхара Брэсцкай вобласці, які перавозіў у бок расійскай мяжы звыш 18 т каляровага металу коштам больш як 25 тыс. рублёў.
Яшчэ дзве спробы незаконна вывезці метал у РФ спынілі ў лютым. 35-гадовы жыхар Оршы меў намер пераправіць праз мяжу каля 5 т лому каляровых металаў на суму больш за 60 тыс. рублёў; у іншы дзень яго 30-гадовы зямляк спрабаваў вывезці 5,3 т такога ж лому коштам каля 25 тыс. рублёў.
