Дэмакратычную будучыню Беларусі абмяркуюць 18 чэрвеня на сесіі Еўрапейскага эканамічнага і сацыяльнага камітэта

14 чэрвеня, Позірк. Дэбаты пра дэмакратычную будучыню Беларусі пройдуць 18 чэрвеня ў Бруселі ў рамках пленарнай сесіі Еўрапейскага эканамічнага і сацыяльнага камітэта (EESC), вынікае з парадку дня EESC.

Адзначаецца, што разам з дэбатамі адбудзецца падпісанне мемарандума аб узаемаразуменні паміж EESC і беларускімі дэмакратычнымі сіламі на чале са Святланай Ціханоўскай.

Пра абмеркаванне падпісання згаданага мемарандума сёлета ў лютым “Позірку” паведаміў галоўны дарадца дэмлідара Франак Вячорка па выніках сустрэчы Ціханоўскай з прэзідэнтам EESC Оліверам Ропке. Тады ж кіраўнік камітэта запрасіў беларускага палітыка выступіць на пленарнай сесіі EESC “з прамовай пра выклікі, з якімі сутыкаюцца беларусы як унутры краіны, так і ў выгнанні”.

На той сустрэчы бакі таксама дамовіліся правесці пад эгідай EESC серыю мерапрыемстваў, прысвечаных “падтрымцы незалежных медыя, прафсаюзаў, уразлівых груп і развіццю сумленнага бізнесу ў выгнанні”.

Еўрапейскі эканамічны і сацыяльны камітэт — кансультатыўны орган Еўрасаюза, у які ўваходзяць прадстаўнікі асацыяцый працадаўцаў, прафсаюзаў і арганізацый грамадзянскай супольнасці.