Перастаў адкрывацца сайт “Вечаровага Бабруйска”

30 траўня, Позірк. У Беларусі і з-за мяжы перастаў адкрывацца сайт газеты “Вечаровы Бабруйск”.

Паводле інфармацыі “Нашай нівы”, пры спробе зайсці на старонку знутры краіны з’яўляецца заглушка з тэкстам пра тое, што сайт заблакаваны паводле рашэння Міністэрства інфармацыі.

28 траўня паведамлялася, што сілавікі прыйшлі ў рэдакцыі рэгіянальных незалежных выданняў “Вольнае Глыбокае” (Віцебская вобласць), “Бабруйск Інфа” і “Вечаровы Бабруйск” (Магілёўская).

Прэтэнзіі заключаюцца ў тым, што яны нібыта пісалі матэрыялы на замову пра Германію і атрымлівалі за гэта ўзнагароду ад нямецкага пасольства.

У сюжэце дзяржтэлеканала АНТ было паказана, як у рэдакцыю заходзяць узброеныя людзі ў форме і патрабуюць ад усіх супрацоўнікаў падняць рукі ўгору. Затым у кадры фігуруюць дакументы аб аплаце, перапіскі, назвы артыкулаў.

“У Беларусі раскрыта цэлая сетка экстрэмісцкіх выданняў, якая займалася прасоўваннем нямецкіх інтарэсаў. Для гэтага фінансаваліся невялікія рэгіянальныя выданні апазіцыйнай скіраванасці. Аплачвала гэта пасольства Германіі ў нашай краіне з простым патрабаваннем: усхваляць усё нямецкае, супрацьпастаўляючы беларускаму”, — гаворыцца ў падводцы да сюжэту.

Аўтар Ігар Тур сцвярджае, што з 2020 года “нямецкае пасольства выдаткавала каля 226 тысяч долараў на артыкулы рэкламнага характару, якія нібыта праслаўлялі цудоўную Германію ў параўнанні з менш цудоўнай Беларуссю”.

У сюжэце таксама паказаны ператрус у галоўрэда “Вечаровага Бабруйска” Валянціна Сысоя, у якога “выпадкова былі знойдзены” пнеўматычная вінтоўка і пісталет, імітацыйная граната.

Паказаны ў сюжэце допыт былога рэдактара “Бабруйскага кур’ера” Анатоля Санаценкі, пра затрыманне і арышт на 15 сутак якога паведамлялася ў красавіку гэтага года.

Судзячы па кадрах аператыўнай здымкі, затрыманні і допыты адбываліся ў канцы сакавіка — пачатку красавіка. Пра лёс затрыманых не паведамляецца.

Пасля падаўлення маштабных пратэстаў супраць сфальсіфікаваных прэзідэнцкіх выбараў 2020 года і жорсткасці сілавікоў рэжым Лукашэнкі пачаў метадычна знішчаць непадкантрольную яму частку медыясектара. Асноўныя незалежныя СМІ былі разгромлены, многія іх супрацоўнікі апынуліся пад крымінальным пераследам або былі вымушаныя пакінуць краіну, ратуючыся ад рэпрэсій, і аднавіць працу за мяжой.

Дзейнасць і матэрыялы незалежных СМІ метадычна абвяшчаюцца “экстрэмісцкімі”, за супрацоўніцтва з імі пагражае крымінальная адказнасць.