22 красавіка, Позірк. “Распаўсюджванне ў сеці інтэрнэт фэйкаў, якія выклікаюць паніку і распальваюць міжнацыянальную варожасць, караецца па законе!” — з такім папярэджаннем выступіла 22 красавіка Міністэрства ўнутраных спраў Беларусі ў сувязі з тым, што “бойка паміж двума мараканцамі” ў выхадныя ў Гомелі, якія “выяснялі адносіны праз побытавы канфлікт”, паводле сцвярджэння ведамства, “абрасла чуткамі і выдумкамі”.
Перад заявай МУС адзін з праўладных тэлеграм-каналаў абурыўся чуткамі, якія нібыта распаўсюджваюць у сацсетках “дэструктыўныя сілы”, пра тое, што бойка адбылася паміж прадстаўнікамі “першага дэсанта са 150 тыс. пакістанцаў”, пра прапрацоўку магчымасці прыбыцця якіх у Беларусь заявіў Аляксандр Лукашэнка 11 красавіка на сустрэчы ў Мінску на сустрэчы з дэлегацыяй на чале з прэм’ер-міністрам Пакістана Шахбазам Шарыфам.
На думку канала, “медыйны псіхоз выкананы паводле тых жа лякал, што і некалькі гадоў таму, калі нагняталі сітуацыю, што “панапрыедуць кітайскія рабочыя і ўсё тут захопяць”. Са спасылкай на блізкі да сілавікоў тэлеграм-канал абвешчана, што “за асабліва гаваркімі бруднаротымі каментатарамі ўжо выехалі супрацоўнікі міліцыі”.
У сувязі з інцыдэнтам МУС адзначыла, што “нягледзячы на значны рост колькасці гасцей, якія ўязджаюць у краіну, рост злачыннасці з іх удзелам не зафіксаваны”. “Пад строгім кантролем праваахоўных органаў” знаходзяцца не толькі пытанні ўезду і выезду з рэспублікі, але і знаходжання ў краіне. Пры гэтым “да кожнага парушальніка заканадаўства прымяняюцца самыя строгія меры рэагавання, аж да выдварэння з краіны”.
Паводле інфармацыі МУС, “аператыўна прыбыўшыя на месца здарэння” ў Гомелі супрацоўнікі міліцыі “затрымалі маладых людзей, аказалі неабходную медыцынскую дапамогу”, вырашаецца пытанне пра “прыцягненне іх да адказнасці і выдварэнне з краіны”.
Даведка “Позірку”. Згодна арт. 130 Крымінальнага кодэкса Беларусі, “наўмысныя дзеянні, накіраваныя на распальванне расавай, нацыянальнай, рэлігійнай або іншай сацыяльнай варожасці ці варажнечы паводле прыкметы расавай, нацыянальнай, рэлігійнай, моўнай або іншай сацыяльнай прыналежнасці, караюцца штрафам, або арыштам, або абмежаваннем волі на тэрмін да пяці гадоў, або пазбаўленнем волі на той жа тэрмін”.
“Тыя ж дзеянні, спалучаныя з гвалтам або здзейсненыя службовай асобай з выкарыстаннем сваіх службовых паўнамоцтваў, караюцца пазбаўленнем волі на тэрмін ад трох да дзесяці гадоў”.
Калі вышэйназваныя дзеянні былі здзейсненыя групай асоб або пацягнулі праз неасцярожнасць смерць чалавека ці іншыя цяжкія наступствы, то яны караюцца пазбаўленнем волі на тэрмін ад пяці да дванаццаці гадоў.
Аўтарызавацца
Забыліся пароль?
Выхад з профілю
