Беларусам часова дазволілі звяртацца па фінскую візу ў размешчаныя ў РФ візавыя цэнтры VFS

27 сакавіка, Позірк. Грамадзяне Беларусі могуць “часова падаваць заявы на візу ў візавыя цэнтры Фінляндыі, размешчаныя ў Расіі, без неабходнасці пацвярджэння законнага знаходжання ў Расіі на працягу 6 месяцаў”, паведамляе сайт VFS Global.

Дазвол распаўсюджваецца на “ўсе катэгорыі заяўнікаў”, гаворыцца ў паведамленні.

Кіраўнік офіса беларускіх дэмакратычных сіл у Эстоніі, намеснік прадстаўніка Аб’яднанага пераходнага кабінета па сацыяльнай палітыцы (пытанні міграцыі) Віталь Малчанаў заявіў, што гэта стала магчымым “дзякуючы згуртаванню беларусаў у Фінляндыі і офісу Святланы Ціханоўскай”.

“Рашэнне дапаможа тым, хто плануе запытаць візу па працы, навучанні, для блізкіх сваякоў і гэтак далей”, — адзначыў ён.

VFS Global — найбуйнейшая ў свеце кампанія, якая прадстаўляе паслугі па апрацоўцы візавых заяў і спадарожных дакументаў. Супрацоўнічае з уладамі і дыпламатычнымі місіямі розных дзяржаў; тысячы візавых цэнтраў адкрытыя ў больш як 150 краінах.