Рыжанкоў анансаваў адкрыццё прамых авіязносін паміж Беларуссю і Аманам

15 снежня, Позірк. Паміж Беларуссю і Аманам будуць наладжаныя прамыя авіязносіны, паведамляе прэс-служба Міністэрства транспарту і камунікацый са спасылкай на кіраўніка МЗС Максіма Рыжанкова.

Міністр “выказаў упэўненасць, што паветраныя зносіны сур’ёзна паўплывае на турыстычныя адносіны паміж дзвюма дзяржавамі”, гаворыцца ў паведамленні.

Адзначаецца, што “прамы рэйс і магчымасць знаходжання ў Амане без візы дазволяць адкрыць патэнцыйныя магчымасці для бізнесу”.

“Усе ўзгадненні прайшлі, практычна засталіся толькі тэхнічныя моманты. Пры іх рэалізацыі ў самы бліжэйшы час ужо, напэўна, з лютага мы зможам пра гэта ў практычнай плоскасці казаць”, — сказаў Рыжанкоў.

14 снежня паведамлялася аб пачатку дзеяння спрошчанага ўезду ў Аман для грамадзян Беларусі. Без візы ў краіне можна знаходзіцца не больш за 14 дзён.

Рыжанкоў цяпер знаходзіцца ў Амане, куды напярэдадні з рабочым візітам прыбыў Аляксандр Лукашэнка. 15 снежня ён правёў перамовы з султанам Амана Хайсамам бен Тарэкам аль Саідам, абмеркаваўшы з ім “стан і перспектывы развіцця адносін”.

Паводле даных Міністэрства замежных спраў, у 2021 годзе тавараабарот паміж Беларуссю і Аманам складаў 1,5 млн долараў (беларускі экспарт — 0,9 млн). У аснове паставак з Беларусі тады ляжалі калійныя ўгнаенні і прадукты харчавання. Актуальнай інфармацыі на сайце МЗС не прадстаўлена.