10 кастрычніка, Позірк. На 0,44% выраслі ў Беларусі спажывецкія кошты ў верасні 2024 года, вынікае са звестак Нацыянальнага статыстычнага камітэта.
Харчовыя тавары падаражэлі на 0,51%, нехарчовыя — на 0,48%, паслугі — на 0,25%.
З пачатку года цэны павялічыліся на 3,8%. Харчаванне стала даражэйшым на 3,7%, нехарчовыя тавары — на 3,32%, паслугі — на 4,56%.
Рост коштаў за 12 месяцаў (верасень да верасня) склаў 6% (на харчовыя тавары — 7,5%, нехарчовыя — 4,2%, на паслугі — 5,6%).
Сёлета ў жніўні Белстат зафіксаваў зніжэнне коштаў на 0,07%.
Па ўзроўні інфляцыі ў 2024 годзе верасень заняў пятае месца пасля лютага (0,94%), студзеня (0,79%), чэрвеня (0,60%) і сакавіка (0,47%). Менш кошты выраслі ў красавіку (0,43%), траўні (0,11%) і ліпені (0,03%).
Улады разлічваюць па выніках 2024 года ўтрымаць інфляцыю ў межах 6%, у 2025 годзе — 5%.
