2 верасня, Позірк. Для абароны і захавання “самабытнасці, нацыянальнага суверэнітэту і незалежнасці, эфектыўнага адказу на знешнія выклікі” сёння неабходныя “салідарнасць, падтрымка і давер паміж краінамі”, адзначыў Аляксандр Лукашэнка, віншуючы 2 верасня генеральнага сакратара ЦК Кампартыі В’етнама, прэзідэнта краіны То Лама з Днём незалежнасці.
“Менавіта такі падыход да развіцця палітычнага дыялога дэманструюць Мінск і Ханой, што стварае цвёрдую, надзейную аснову для паспяховага пашырэння двухбаковай супрацы па ўсіх напрамках”, — прыводзіць тэкст паслання прэс-служба віншавальніка.
Дыпламатычныя стасункі паміж Беларуссю і В’етнамам усталяваныя 24 студзеня 1992 года. Беларускае гандлёвае прадстаўніцтва ў Ханоі было пераўтворана ў амбасаду ў снежні 1997 года, в’етнамская дыпмісія ў Мінску адкрылася напрыканцы 2003-га.
У снежні 2023 года ў Хашыміне адкрыта генеральнае консульства Беларусі.
Паводле даных МЗС, тавараабарот Беларусі і В’етнама ў 2021 годзе склаў 200,3 млн долараў (беларускі экспарт — 92,9 млн, в’етнамскія пастаўкі — 107,4 млн, адмоўнае сальда — 14,5 млн). Актуальных звестак у адкрытым доступе няма.
