«Заробак павышаюць таемна». Як маецца LeverX у трох лакацыях

LeverX Group — глабальны стратэгічны партнёр SAP. Да восені 2021 года кампанія ўваходзіла ў топ-10 найбуйнейшых ІТ-кампаній у Беларусі. У мінскім і рэгіянальных офісах кампаніі працавала больш за 1100 супрацоўнікаў.

Але за апошнія 2,5 гады штат беларускага офіса скараціўся больш як напалову. Частка супрацоўнікаў рэлакавалася ў Польшчу, Літву і іншыя лакацыі.

На сёння ў кампаніі адкрыта 15 офісаў у 10 краінах. Глабальны штат (зыходзячы з інфармацыі на сайце) налічвае больш за 1600 супрацоўнікаў.

Беларусь

Да поўнамаштабнай вайны ва Украіне LeverX Group актыўна пашыралася ў Беларусі. Напрыклад, пры канцы 2021 года былі адкрытыя новыя офісы ў Брэсце і Гродне. Да гэтага з’явіўся офіс у Гомельскім тэхнапарку.

Пасля 24.02.2022 кампанія масава вывозіла супрацоўнікаў у Грузію, Узбекістан, Казахстан (часовая рэлакацыя), а таксама пачала актыўна развіваць кампаніі ў Польшчы і Літве.

Цяпер на сайце ў пераліку лакацый больш няма згадкі пра Беларусь і дзейныя офісы. Хоць у краіне працягвае працаваць вялікая каманда, сцвярджаюць супрацоўнікі, — «каля 400-500 чалавек».

— Апошнім часам зноў пачалі лунаць чуткі, што SAP, асноўны кліент і партнёр, пачне трэкаць лакацыі работнікаў. Але пакуль незразумела, як гэта рэалізуюць, а такія чуткі лунаюць ад 2022 года. 

Кампанія кропкава наймае спецыялістаў у Беларусі. За апошні месяц LeverX Group размясціла больш за 10 вакансій на rabota.by. шукае, у прыватнасці, распрацоўшчыкаў, Data Scientist, Business Development Manager, UX/UI Designer.

Грошы. 2 фултаймы = 1,5 зарплаты

Многія адзначаюць асаблівасць: у LeverX Group адпачынак і бэнч аплачваюць напалову, затое можна браць некалькі фултайм-праектаў і так павышаць сабе зарплату (што праўда, не ў два разы).

— Дапусцім, на фултайм-праекце ты атрымліваеш 2 тысячы долараў. На бэнчы толькі 50% ад заробку — тысячу долараў. Калі праект на 50% загрузкі, то 1,5 тысячы долараў. А калі бярэш другі фултайм-праект, то атрымаеш 1,5 заробку — 3 тысячы долараў.

Камусьці па выніках перфоманс-рэв’ю не павышаюць. Напрыклад, калі супрацоўнік на бэнчы або ў яго мала аплачваных гадзін, калі ніякіх дасягненняў і росту не было за год. То-бок проста дамагчыся карэкціроўкі на інфляцыю нерэальна.

Чуў, што на перфоманс-рэв’ю абмяркоўваецца павышэнне зарплаты брута. Мне здаецца, гэта страхоўка на выпадак рэлакейту або падатковых змен у Беларусі. 

Я б не сказаў, што заробкі ў LeverX Group ніжэйшыя за рынак. Проста кампанія цяпер карыстаецца [крызіснай] сітуацыяй і не хоча павышаць.

Заўвага: наш спікер з Беларусі не згадвае замарозкі пераглядаў заробкаў. Але суразмоўцы з іншых офісаў кажуць, што ад пачатку 2023 зп у кампаніі пераглядаюць толькі ў выглядзе выключэння.

Праекты. «Нядрэнна»

— У цэлым сітуацыя з праектамі нядрэнная. Хоць пасля вайны падраздзяленне, якое працуе на СНД і, у прыватнасці, на Расію, засталося без працы. Бо праектаў SAP у Расіі стала катастрафічна мала. Падраздзяленне стала актыўна асвойваць новыя рынкі, праз гэта ўнутры кампаніі вырасла канкурэнцыя за праекты.

Польшча

Галаўны офіс LeverX Group знаходзіцца ва Уроцлаве. Ён быў адкрыты яшчэ вясной 2021 года.

— Мы выбралі Уроцлаў як адзін з ІТ-цэнтраў, якія хутка развіваюцца ў Польшчы. Яго называюць мясцовай «Крэмніевай далінай»: тут ужо прысутнічаюць вядомыя міжнародныя кампаніі і пастаянна адкрываюцца офісы буйных гульцоў ІТ-рынку і стартапаў, — заяўляла тады кампанія.

Летась адкрыўся яшчэ адзін польскі офіс — у Варшаве, «для лепшага супрацоўніцтва з кліентамі са сталіцы і бліжэйшых ваяводстваў».

Інфармацыя пра колькасць спецыялістаў LeverX Group ў Польшчы адрозніваецца.

У лінкедзіне больш за 650 чалавек пазначылі LeverX Group у якасці актуальнага месца працы і Польшчу ў якасці Актуальнай лакацыі. Паводле даных польскіх медыя, у жніўні мінулага года ў кампаніі ў Польшчы працавала больш за 300 супрацоўнікаў, пры гэтым кампанія планавала пашырыць штат на 30% (пра тэрміны пашырэння не паведамлялася).

Між тым супрацоўнікі сцвярджаюць, што ў двух офісах на сёння працуе 200-400 чалавек.

На сайце кампаніі размешчана больш за 50 вакансій, дзе ў якасці лакацыі на выбар указаная Польшча, — 20% ад усіх вакансій у цэлым па кампаніі (250+). 

Рэлакейт. Бонус быў, але карысталіся не ўсе

Пасля 24.02 рэлакавалі ўсіх ахвотных, кажуць супрацоўнікі, кампанія дапамагала з візамі, выкупляла квіткі да Грузіі, Арменіі. Было два варыянты рэлакацыі — пастаянная і часовая.

— Можна было проста прыехаць на час у нейкую лакацыю і папрацаваць на беларускі офіс. Пакрывалі выдаткі на праезд і два тыдні пражывання (не больш за 52 еўра на суткі). 

На пастаянку — адразу пераафармлялі ў польскі офіс. 

— Я пераехаў у Польшчу ў 2023. На той момант магчымасць для рэлакацыі была ва ўсіх супрацоўнікаў у Беларусі, але пры ўмове наяўнасці актыўнага праекта. Рэлакейт-бонус на жаданне — 1,5 тысячы долараў.

Паводле інфармацыі каманды, бонусам карысталіся не ўсе, паколькі яго «трэба вярнуць пры датэрміновым разрыве кантракта». А яшчэ памер бонусу залежаў ад чэкаў, якія супрацоўнік змог паказаць:

— Рэлакейт-бонус у маім выпадку быў 3500 злотых (больш за 880 долараў). Пры гэтым усе выдаткі трэба было пацвердзіць чэкамі. Атрымаў я яго прыкладна праз 1,5 года пасля рэлакейту.

Легалізацыяй займаліся самі:

— Усё рабіў сам. На ДНЖ падаўся з дапамогай агенцтва, заплаціў за поўнае суправаджэнне сваёй справы 1800 злотых (каля 450 долараў). Ужо атрымаў дэцызію, чакаю пластык.

Ад восені 2022 года, па назіранні супрацоўнікаў, рэлакейт прапаноўвалі ўжо не ўсім, а з «вытворчай неабходнасці».

Грошы. «Не плацяць па еўрапейскіх рэйтынгах»

У адрозненне ад беларускага офіса, тут шмат скаргаў на зп. Многія наракаюць, што пры пераездзе не было перагляду (у кагосьці засталася тая ж сума брута, камусьці адкарэктавалі на памер падатку) і зарплата атрымалася неканкурэтнай для еўрапейскага рынку.

— Кампанія не гатовая плаціць па еўрапейскіх рэйтынгах. Напрыклад, мідл-распрацоўшчык атрымлівае прыкладна 12 тысяч злотых да выліку падаткаў (больш за 3 тысячы долараў). Хоць з майго досведу сумоўяў у розныя кампаніі еўрапейскі працадаўца гатовы даваць 22-24 тысячы злотых для мідла (5,5-6 тысяч долараў).

Хтосьці ў выніку сышоў:

— Ёсць кейсы, калі распрацоўшчык ужо даўно не джун, а мідл, але яму не праводзяць асэсменту і ён атрымлівае менш, чым сярэдні заробак па Варшаве. Я ў выніку звольніўся, бо атрымаў офер, якога кампанія мне ніколі б не прапанавала. 

Або вось:

— Мая зарплата выявілася ніжэйшай у два разы ў параўнанні з польскімі кампаніямі для такой жа пазіцыі. На штогадовым асэсменце запытаў канкурэнтную суму. У выніку заробак павялічылі на 35%, але з умовай: бэнч і адпачынак — 50%. Па выніку праз неканкурэнтную зарплату і замаразкі зарплатных асэсментаў я звольніўся. Спрабавалі ўтрымаць, але канкурэнт прапанаваў такую зарплату, якой у LeverX не маглі даць.

Перагляды зарплаты ў кампаніі замарожаныя ад пачатку 2023, некалькі спікераў падкрэслілі, што калі камусьці павышаюць — просяць гэтага не абмяркоўваць з камандай.

Праекты. «Ёсць людзі з некалькімі фултаймамі»

Камусьці здаецца, што праектаў няшмат і яны часта не дапамагаюць развівацца прафесійна:

— Перыядычна прыходзяць новыя праекты, але ў асноўным гэта састарэлыя тэхналогіі, распрацоўшчыку развівацца на іх складана.

— З праектамі ў Польшчы туга. Калі нешта знаходзяць, то гэта страшны легасі. За апошнія паўгода праектаў стала менш.

Аднак, відаць, гэта залежыць ад дэпартамента:

— Нядаўна прыйшлі праекты — толькі для тых, хто ў Еўропе. Цяпер, хутчэй, пытанне, дзе ўзяць столькі джавістаў. 

Літва

Літоўскі офіс LeverX Group быў адкрыты восенню 2021 года. Паводле даных rekvizitai.vz.lt, на сёння там зарэгістравана 15 супрацоўнікаў. Па выніках 2022 года (даных за 2023 год пакуль няма) даход кампаніі ад продажаў вырас амаль у два разы адносна 2021 года, перавысіўшы 1,7 мільёна еўра. Чысты прыбытак кампаніі па выніках 2022 года вырас амаль у 9 разоў і склаў 52+ тысячы долараў. 

Рэлакейт. «Хуткі BlueCard»

Ахвотных пераехаць у Літву было няшмат «праз высокія падаткі», умовы з імі абмяркоўвалі індывідуальна.

— Усе выдатна ведалі, як доўга можна чакаць ДНЖ у Польшчы. І былі выпадкі, калі ў супрацоўнікаў, якія хацелі працаўладкавацца ў польскі офіс, узнікалі складанасці з легалізацыяй. Яны ў выніку прасілі іх рэлакаваць у Літву, у адваротным выпадку пагражалі звольніцца. Хтосьці пераязджаў у Літву з асабістых прычын. Напрыклад, планаваў ездзіць да родных у Беларусь, а з Уроцлава дабірацца далёка.

З плюсаў — «кампанія дапамагала з афармленнем дакументаў, і на працягу месяца можна было атрымаць апруў на BlueCard». 

З бонусам умовы прыкладна тыя ж: 1,5 тысячы еўра з прывязкай да чэкаў.

— Дарэчы, пазней суму бонусу сталі памяншаць. Чуў, што тым, хто рэлакаваўся ў 2023 годзе, ужо адмаўлялі ў выплаце.

Грошы. Прыкладна як любы іншы аўтсорс з беларускімі каранямі

Заробку таксама не пераглядалі, маглі карэктаваць на суму падатку, кажуць супрацоўнікі.

Па выніках снежня 2023 года LeverX Group увайшла ў топ-10 ІТ-кампаній з беларускімі каранямі ў Літве па ўзроўні сярэдняй зарплаты. Але па выніках студзеня гэтага года выпала з першай дзясяткі. Паводле дадзеных rekvizitai.vz.lt, за студзень сярэдні заробак брута ў кампаніі склаў амаль 4,6 тысячы еўра брута.