Самы папулярны выдавец гульняў канчаткова сышоў з Беларусі. Хто з мабільных распрацоўшчыкаў застаўся?

Беларуска-брытанскі мабільны распрацоўшчык і паблішар. 

Галаўны офіс Gismart знаходзіцца ў Лондане. Каманда паблішара працуе ў Беларусі, Польшчы (пры канцы 2022 быў афіцыйна адкрыты офіс у Варшаве) Украіне, Партугаліі і Вялікабрытаніі. У 2022 годзе Gismart адкрыла некалькі карпаратыўных хабаў у Еўропе і абвясціла пра пераход на фармат працы Remote First.

У штаце кампаніі больш за 250 супрацоўнікаў, мяркуючы з інфармацыі на сайце. Раней асноўны офіс распрацоўкі і асноўная каманда працавалі ў Беларусі. Восенню 2021 года ў беларускім офісе было каля 200 супрацоўнікаў. 

Цяпер, відавочна, большая частка супрацоўнікаў працуе ў Польшчы. У лінкедзіне больш за 80 супрацоўнікаў Gismart паказалі гэтую краіну ў якасці актуальнай лакацыі. 

Што тычыцца Беларусі, то яшчэ раней кампанія заяўляла, што ў краіне засталося каля чвэрці супрацоўнікаў (прыкладна 70 чалавек). 

У Gismart больш за 30 млн актыўных карыстальнікаў штомесяц. У партфелі кампаніі 60+ гульняў і праграм, агульная колькасць загрузак большая за 1 мільярд.

Але, мяркуючы з інфармацыі на сайце і профілі ў сацсетках, Gismart больш не пазіцыянуе сябе як распрацоўшчыка гульняў. Кампанія засяродзілася на распрацоўцы ўтыліт, праграм для здароўя і музычных праграм.

Летась Gismart інтэгравала доступ да вялікай аўдыяплатформы SoundCloud у сваю праграму для пачаткоўцаў і прафесійных дыджэяў DJ it!.

Мабільны распрацоўшчык, спецыялізуецца на галаваломках і лагічных гульнях. Заснавальнікі кампаніі — Пётра Скаромны, Мацвей Цімашэнка і Алег Грушэвіч.

На пачатку 2021 года Easybrain купіла шведская кампанія Embracer Group за 640 мільёнаў долараў. Праз год пасля ўгоды Easybrain стала самым прыбытковым падраздзяленнем у шведскім холдынгу. Кампанія зарабіла на гульнях больш за 220 мільёнаў долараў. 

Але днямі шведскі холдынг Embracer Group абвясціў аб угодзе па продажы Easybrain швейцарскаму паблішару мабільных гульняў Miniclip за 1,2 мільярда долараў. 

Штаб-кватэра Easybrain знаходзіцца ў Лімасоле (Кіпр). Па-ранейшаму працуе офіс распрацоўкі ў Мінску. У кампаніі працуюць 340 чалавек, але колькі іх іх працуе ў мінскім офісе — невядома. 

Частка каманды працуе на Кіпры, частка — у Польшчы, дзе кампанія адкрыла падраздзяленне яшчэ ў 2022 годзе. Мяркуючы з фінансавых справаздач, польская юрыдычная асоба працуе даволі эфектыўна. За гэты год выручка кампаніі вырасла ў 9 разоў і перавысіла 28 млн злотых (каля 7 млн долараў). Чысты прыбытак вырас у 7 разоў — да 1,4 млн злотых (больш за 350 тысяч долараў). 

У партфоліа Easуbrain больш за 10 гульняў. Агульная колькасць загрузак перавысіла 2 млрд. Самымі папулярнымі гульнямі, якія забяспечваюць асноўныя загрузкі, з’яўляюцца, у прыватнасці, класічная лагічная гульня Sudoku.com, размалёўка па нумарах ixel Art, лагічная галаваломка з малюнкамі Nonogram.com, гульня-галаваломка Jigsaw Puzzles.

Адзін з папулярных паблішараў з беларускімі каранямі. Дырэктар і сузаснавальнік Vizor Games — Сяргей Бруй.

У 2019 годзе ў кампанію інвеставаў адзін з найбуйнейшых сусветных мабільных распрацоўшчыкаў Playrix.

Па выніках 2021 года Vizor Games заняла першае месца сярод мабільных распрацоўшчыкаў з беларускімі каранямі па аб’ёме выручкі (паводле даных аналітычнай платформы Sensor Tower).

Галаўны офіс кампаніі знаходзіцца на Кіпры. Таксама ёсць падраздзяленні ў Літве, Украіне і Беларусі. Але супрацоўнікі кампаніі працуюць у розных краінах. Летась колькасць такіх краін была 26. 

Увесну гэтага года топы Vizor Games вырашылі змяніць імя кампаніі ў Беларусі — цяпер яна называецца «ГеймТэк». Якія былі матывы для перайменавання, топ-менеджмент камандзе ў Мінску не патлумачыў, расказваў dev.by адзін з супрацоўнікаў кампаніі.

Пасля рэбрэндынгу ў «ГеймТэка» (Vizor Games) застаўся ранейшы ўласнік. 100% долі «ГеймТэка» належыць кіпрскай «Асміне Холдынгс Лімітэд», заснаванай восенню 2020 года. Памер статутнага фонду — большы за 5,6 мільёнаў рублёў (1,7+ мільёна долараў).

У Vizor больш за 600 супрацоўнікаў, прыкладна палова агульнага штату працуе ў Беларусі. Мяркуючы з актыўнага наймання, беларускі офіс закрываць не плануецца. За апошні месяц на rabota.by кампанія размясціла каля 30 вакансій для працы ў Мінску. 

Vizor Games таксама сумесна са студыяй Strikerz стварыла бясплатны футбольны сімулятар UFL, які называюць канкурэнтам вядомага футбольнага сімулятара EA Sports FC. У снежні мінулага года распрацоўшчыкі UFL прыцягнулі інвестраўнд на 40 мільёнаў долараў. У ліку інвестараў апынуўся вядомы партугальскі футбаліст Крышціяну Раналду.

Геймдэў-кампанія родам з Магілёва (заснаваная ў 2002 годзе), распрацоўвае гульні «тры-ў-шэраг». 

У кампаніі працуе больш за 130 чалавек. Галаўны офіс Awem Games знаходзіцца на Кіпры. У Беларусі ў Awem Games было два падраздзяленні — у Мінску і Магілёве.

Але яшчэ ў 2022 годзе кампанія закрыла офіс у Мінску, захаваўшы юрыдычную асобу і офіс у Магілёве. Дырэктар ТАА «ЭйДжы Прадакшан» (Awem Games) Антон Філімонаў тады тлумачыў, што прайшла звычайная паэтапная аптымізацыя офісных плошчаў. Супрацоўнікаў мінскага офіса перавялі на аддаленую працу.

Асноўная частка каманды Awem Games знаходзіцца ў Беларусі. Кампанія актыўна наймае новых супрацоўнікаў. 

Ад моманту заснавання Awem Games выпусціла больш за 30 гульняў. Ключавы прадукт кампаніі — Cradle Of Empires (казуальная гульня, у якой карыстальнік мае збіраць скарбы).

Міжнародны распрацоўшчык мабільных гульняў у жанры Lifestyle. Кампанія была заснаваная ў 2018 годзе. У 2019 годзе распрацоўшчыка купіла My.Games (былое гульнявое падраздзяленне VK).

Па выніках 2020 года гульня Love Sick: Interactive Stories, распрацаваная Swag Masha, апынулася ў топе-5 найбуйнейшых праектаў MY.GAMES. На той момант праект прыносіў штомесяц 2,6+ мільёна долараў выручкі.

Галаўны офіс кампаніі знаходзіцца ў Амстэрдаме. Таксама ёсць офісы ў Лос-Анджэлесе і Мінску. У камандзе Swag Masha больш за 100 супрацоўнікаў, з іх прыкладна палова працуе ў Беларусі.

Выдавец і распрацоўшчык гульняў. У цяперашні час кампанія сканцэнтраваная на жанры гібрыдна-казуальных гульняў.

Кампанія была створаная ў 2020 годзе, афіцыйна юрыдычная асоба была зарэгістраваная ў лютым. У кастрычніку 2020 года ў Mamboo Games інвеставаў My.Games (былое гульнявое падраздзяленне VK). Падраздзяленне набыло мінарытарную долю мабільнага распрацоўшчыка.

Праз год My.Games стаў уладальнікам кантрольнага пакета акцый Mamboo Games. А ў верасні 2022 года стала вядома, што VK заплаціў за распрацоўшчыка мабільных гульняў з беларускімі каранямі 4 млн долараў. 

Галаўны офіс Mamboo Games на дадзены момант знаходзіцца ў ААЭ. Юрыдычная асоба ў Беларусі таксама працягвае функцыянаваць. 

У камандзе Mamboo Games больш за 40 спецыялістаў. Мяркуючы з лінкедзіна, супрацоўнікі кампаніі працуюць з некалькіх краін — Беларусь, Польшча, ААЭ, Сербія, Германія, Літва.

Студыя распрацоўвае казуальныя мабільныя гульні. Melsoft Games (раней называлася Melesta Games) заснаваў Аляксей Меляшкевіч у 2007 годзе. У 2015 годзе выдаўцом гульняў Melsoft Games і яе ўладальнікам стаў Wargaming. У студыі памяняўся топ-менеджмент, а штат у Мінску вырас да амаль 250 чалавек.

Пры канцы 2020 года стала вядома, што Wargaming прадаў Melsoft Games ізраільскай кампаніі Moon Active. Медыя ацэньвалі ўгоду ў сотні мільёнаў долараў.

У жніўні мінулага года аналітычная платформа AppMagic паведаміла, што агульныя выдаткі карыстальнікаў на мабільныя гульні Melsoft Games за ўвесь час працы кампаніі дасягнулі адзнакі ў мільярд долараў. Амаль уся сума была размеркаваная паміж двума асноўнымі праектамі Family Island (гульцы пакінулі на гульні 70%) і My Cafe (28%). На астатнія праекты гульцы выдаткавалі ўсяго 2% ад мільярда долараў. 

У кампаніі працуе больш за 140 чалавек. На сёння Melsoft Games пазіцыянуе сябе як распрацоўшчык казуальных гульняў з офісамі ў Тэль-Авіве і Літве. Юрыдычная асоба ў Вільні (MA Lithuania) уваходзіць у лік найбуйнейшых падаткаплацельшчыкаў сярод ІТ-кампаній з беларускімі каранямі. 

Але беларуская юрыдычная асоба «Мелсофт» таксама працягвае працаваць. Прынамсі ў адзіным дзяржрэгістры яна фігуруе як дзейная. Колькі па факце чалавек працуе ў Беларусі, невядома. У лінкедзіне больш за 30 супрацоўнікаў кампаніі паказалі Беларусь у якасці актуальнай лакацыі. 

Факусуецца на бізнэс- і лайфстайл-праектах. З’яўляецца распрацоўшчыкам папулярных у свеце прадуктаў iScanner (шматфункцыянальная AI-праграма для сканавання дакументаў у PDF, JPG і TXT фарматах) і Smart Cleaner (праграма ачысткі памяці iPhone і паляпшэння яго прадукцыйнасці). Абедзве праграмы ўваходзілі ў падборку найлепшых у AppStore. 

Сузаснавальнікам BP Mobile з’яўляецца Сяргей Алісеенка. У 2020 годзе аб’яднаў свае праекты ў AIBY Group. Гэта амерыканская кампанія, якая займаецца распрацоўкай і прасоўваннем мабільных праграм са штучным інтэлектам.

Па выніках 2021 года BP Mobile увайшла ў топ-5 мабільных распрацоўшчыкаў з беларускімі каранямі па аб’ёме выручкі (паводле даных аналітычнай платформы Sensor Tower). Агульная колькасць загрузак праграм на сёння перавышае 0,5 млрд. 

У AIBY Group ёсць падраздзяленні ў ЗША, Вялікабрытаніі, на Кіпры, у Польшчы, Беларусі, Украіне, ААЭ. Непасрэдна ў камандзе BP Mobile працуюць 250 чалавек.

Распрацоўшчык гіперказуальных гульняў. Студыя заснаваная ў 2020 годзе. Разам з BPMobile з’яўляецца часткай амерыканскай AIBY Group. 

Гульні FreePlay у розны час станавіліся самымі папулярнымі ў ЗША і свеце. Па выніках 2021 года FreePlay увайшла ў топ-3 самых папулярных паблішараў з офісам у Беларусі. 

У сакавіку гэтага года FreePlay паведаміла, што агульныя загрузкі гульняў перавысілі 1,5 млрд. Траціну ад агульнага аб’ёму загрузак гульні сабралі за апошні год.

Генеральны дырэктар FreePlay Яўген Сідараў вясной гэтага года заявіў, што кампанія збіраецца зрушыць фокус з гіперказуальных гульняў на гібрыдныя казуальныя і казуальныя гульні. 

Офісы FreePlay ёсць у ЗША, Украіне, Беларусі, на Кіпры. У кампаніі працуе больш за 100 чалавек. 

Перакладчык на нейронных сетках. Падтрымлівае больш за 110 моў, дазваляе перакладаць тэкст, голас, выявы, вэб-сайты, дакументы і тэлефонныя званкі.

Стартап быў заснаваны ў 2019 годзе. Заснавальнік стартапа — інжынер-праграміст з Наваполацка Аляксей Рудак.

Восенню 2023 года Lingvanex стаў убудаваным перакладчыкам старонак на 45+ мовах у браўзеры Opera для Android. Таксама стартап разглядаў магчымасць інтэгравацца з іншымі браўзерамі.

У камандзе 40+ чалавек. Кліенцкая база налічвае каля 200 кампаній, з якіх каля 30 — буйныя.