Easybrain прадалі за 1,2 мільярда долараў. Значыць, у беларусаў +1 аднарог?

Easybrain другі раз стала аб’ектам гучнай угоды. На пачатку 2021 года геймдэў-кампанію з беларускімі каранямі купіў шведскі холдынг Embracer Group за 640 мільёнаў долараў. Цяпер ён прадаў актыў швейцарскаму паблішару мабільных гульняў Miniclip — амаль у два разы даражэй. 1,2 мільярда долараў больш чым дастаткова, каб лічыцца аднарогам. 

Дык чаму наогул сумневы?

Калі па выніках чарговага раўнда ацэнка Flo дасягнула 1 мільярда долараў, акцэнт у навінах быў менавіта на ператварэнне стартапа ў аднарога. У паведамленнях пра ўгоду з Easybrain яго няма. Чаму?

Верагодна, таму, што Flo — стартап, а Easybrain — не. Калі кампанія ўпэўнена генеруе прыбытак, не залежыць ад венчурнага капіталу, мае ўстойлівае рынкавае становішча, яна ўжо не стартап. 

У распрацоўшчыкаў казуальных мабільных гульняў зусім іншая бізнэс-мадэль, чым у прадуктовых стартапаў. «Класічныя» аднарогі Flo або Pandadoc стварылі шмат у чым унікальныя і пазнавальныя праграмы. Прадукты Easybrain — гульні накшталт электроннай версіі Sudoku або пазлаў. Такіх гульняў у сторах — сотні ці нават тысячы.

Але ці прымяншае гэтае адрозненне ад класічных стартапаў поспех Easybrain? Аджа менавіта распрацоўшчыку з беларускімі каранямі ўдалося прыцягнуць у свае праекты сотні мільёнаў карыстальнікаў.

Не, заяўляюць эксперты.

«Больш, чым аднарог»

— Вядома, Easybrain — аднарог, — кажа ІТ-прадпрымальнік, стваральнік венчурнай кампаніі Geek Ventures Ігар Маханёк. — Больш, чым аднарог, бо яе ацанілі больш як у мільярд долараў. 

Паводле слоў Маханька, бізнэс-мадэль кампаніі ў дадзеным выпадку не важная — важна толькі тое, колькі кампанія каштуе. У пэўным сэнсе гэтая гісторыя нават круцейшая за гісторыю Flo, бо «атрымаць рэальны кэш пры продажы кампаніі азначае большы поспех, чым ацэнка ў мільярд».

— Калі кампанія прададзеная за мільярд, гэта вялікі поспех, — настойвае прадпрымальнік. — Easybrain, што праўда, была ўжо не зусім незалежнай, так што гэта поспех не толькі фаўндараў, але і папярэдняга ўладальніка кампаніі (Embracer Group — dev.by). Усе — малайцы. Flo — таксама велізарныя малайцы. Проста экзіт у выглядзе продажу кампаніі — гэта вельмі класна.

Адзінае, заўважае Ігар Маханёк, што продаж Easybrain абмяжоўвае патэнцыял для росту кампаніі, так як яна ўжо прададзеная і інвестары атрымалі свае грошы. А такая кампанія, як Flo, у будучыні «можа дасягнуць ацэнкі і ў 10, і 50 мільярдаў».

«Паблішынг-бізнэс са зразумелай бізнэс-мадэллю»

Падобны пункт гледжання выказвае і бізнэс-анёл, заснавальнік Angels Band 2.0 Кірыл Валошын.

— Давайце разважаць лагічна: чым рэальна заплачаная цана 1,2 мільярда долараў горшая за экстрапаляваную ацэнку пры паднятых 200 мільёнах? — кажа ён. — Проста складана назваць гэтую кампанію стартапам паводле хоць якіх крытэраў.

Менавіта таму, што Easybrain не стартап і не скейлап, а паблішынг-бізнэс з больш-менш зразумелай бізнэс-мадэллю, кампанія, на думку Валошына, і не заяўляе пра сябе гучна як пра юнікорна.

«Як мыла ў гарачай вадзе»? Якая будучыня ў новага аднарога

Як заявіў для прэс-рэлізу СЕО Easybrain Алег Грушэвіч, разам з пераходам да новага ўладальніка Easybrain «пачынае новы раздзел». Але што азначае гэтая агульная фармулёўка? Якая будучыня ў юнікорна пасля экзіту? 

— IMHO, гэта як умоўны BMW купіў Mini, — дзеліцца меркаваннем Кірыл Валошын. — І што цяпер з Mini? Усё тое ж самае: выпускаюць «тыя ж» аўтамабілі, толькі на іншых заводах і брэнд належыць ужо не самой Mini. Пры гэтым у выпадку Mini гэта ўсё яшчэ арыгінальны дызайн з адсыланнем да Брытаніі, са сваімі «фішкамі» ў інтэр’еры і іншым.

А можа здарыцца, як з MSQRD або Vochi. Распусціліся, як мыла ў гарачай вадзе, і іх не відаць, не чуваць — робяць агульную справу галаўной карпарацыі без аглядкі на мінулыя поспехі і брэнды. 

А які беларускі юнікорн гэта па ліку?

Так, мы памятаем, што Easybrain — кіпрская кампанія, але па традыцыі працягваем лічыць беларускім усё, што мае айчынныя карані: то-бок кампаніі, заснаваныя ў нашай краіне фаўндарамі-беларусамі. 

Венчурныя інвестары ўжо неяк спрачаліся пра тое, хто наш першы аднарог (там усё тыя ж крытэрыі: стартап — не стартап, прыватная кампанія або публічная). Калі адмесці ўсе прыдзіркі і пакінуць адзіны крытэр — кошт у 1 млрд долараў і большы — то атрымліваецца такі шорт-ліст:

• EPAM;
• Wargaming;
• Pandadoc;
• Flo;
• Easybrain.

PandaDoc или EPAM. А может, WG? Выясняем, кто наш первый единорог

По теме

PandaDoc или EPAM. А может, WG? Выясняем, кто наш первый единорог

Як Flo ішла да ацэнкі ў мільярд. Згадалі галоўныя вехі шляху, які пачынаўся ў Мінску

Па тэме

Як Flo ішла да ацэнкі ў мільярд. Згадалі галоўныя вехі шляху, які пачынаўся ў Мінску