Аддзел навін 18 лістапада 2024, 15:50

У мабільнага распрацоўшчыка з беларускімі каранямі Easbrain, якога прадалі за $1,2 млрд, ужо 2 млрд загрузак

Мабільны распрацоўшчык Easbrain дасягнуў адзнакі ў 2 млрд загрузак. Пра гэта кампанія паведаміла на сваім сайце.

У мінулым годзе гульні кампаніі дасягнулі 1,5 млрд усталёвак. У цэлым ад 2021 года «колькасць загрузак падвоілася, нягледзячы на перыпетыі, з якімі сутыкнуўся рынак мабільных гульняў за гэты перыяд», — паведамілі ў кампаніі.

У партфоліа Easуbrain больш за 10 гульняў. У кампаніі ўдакладнілі, што самымі папулярнымі гульнямі, якія забяспечваюць асноўныя загрузкі, з’яўляюцца, у прыватнасці, класічная лагічная гульня Sudoku.com, размалёўка па нумарах Pixel Art, лагічная галаваломка з малюнкамі Nonogram.com, гульня-галаваломка Jigsaw Puzzles.

На мінулым тыдні шведскі холдынг Embracer Group паведаміў аб угодзе па продажы Easybrain швейцарскаму паблішару мабільных гульняў Miniclip. Сума ўгоды — 1,2 мільярда долараў.

Easybrain прабыў у складзе Embracer Group крыху менш за чатыры гады. Шведскі холдынг набыў мабільнага распрацоўшчыка ў лютым 2021 года за 640 мільёнаў долараў.

Easybrain была самым прыбытковым падраздзяленнем у шведскім холдынгу, і сам холдынг нарошчваў продажы.

Але потым, відавочна, сітуацыя памянялася. На пачатку 2024 года Embracer Group апынулася ў топе па колькасці звольненых супрацоўнікаў.

Easybrain — распрацоўшчык мабільных гульняў, спецыялізуецца на галаваломках і лагічных гульнях. Заснавальнікі кампаніі — Пётра Скаромны, Мацвей Цімашэнка і Алег Грушэвіч.

Колькасць супрацоўнікаў на пачатку 2024 года — 340 чалавек. Штаб-кватэра знаходзіцца ў Лімасоле (Кіпр), па-ранейшаму ёсць офіс распрацоўкі ў Мінску.

2 каментарыя

Тэкст: Аддзел навін

Знайшлі памылку ў тэксце-вылучыце яе і націсніце Ctrl+Enter. Знайшлі памылку ў тэксце-вылучыце яе і націсніце кнопку «Паведаміць пра памылку».