Найпапулярнейшы выдавец мабільных гульняў закрывае офіс у Мінску. Раней ён абяцаў не сыходзіць з ПВТ

Афіцыйна ліквідацыя кампаніі пачалася 19 чэрвеня. Рашэнне было прынятае ўласнікам. Пры гэтым кампанію яшчэ не выдалілі са спіса рэзідэнтаў на сайце ПВТ.

SayGames з’яўляецца адным з самых паспяховых праектаў з беларускімі каранямі па стварэнні мабільных гульняў. 

Кампанія была заснаваная ў 2017 годзе. Сузаснавальнік і гендырэктар — Ягор Вайханскі. 

На дадзены момант у партфоліа паблішара 100+ запушчаных праектаў і больш за 4 мільярды спамповак ва ўсім свеце. SayGames з’яўляецца самым папулярным выдаўцом мабільных гульняў з беларускімі каранямі. 

Гульні SayGames перыядычна станавіліся хітамі, а кампанія апыналася ў сусветным топ-10. 

• У 2019 годзе гульня Sand Balls трапіла ў лік самых прарыўных у свеце.
• У 2020 годзе SayGames апынулася ў дзясятцы найпапулярнейшых мабільных паблішаращ года па версіі аналітычнай платформы Sensor Tower.
• Па выніках 2021 года яшчэ адная аналітычная платформа App Annie ўключыла SayGames у топ-10 найлепшых сусветных распрацоўшчыкаў.
• Летам 2023 года аналітычная кампанія Data.io ўключыла SayGames у топ-30 найлепшых выдаўцоў у рэгіёне EMEA па карыстальніцкіх тратах за перыяд ад студзеня 2022 года да ліпеня 2023 года.

У 2022 годзе кампанія правяла рэструктурызацыю, у выніку якой ліквідавала беларускую юрыдычную асобу «СэйГеймс». У Беларусі засталася працаваць кампанія «Кажыгульні» (яшчэ ў 2021 годзе ўвайшла ў ПВТ).

— Мы былі і застаемся ў Беларусі. Праводзім рэструктурызацыю, нашая кампанія ў ПВТ — гэта «Кажыгульні». З намі ўсё добра, мы не сыходзілі з ПВТ і не збіраемся, — казаў тады COO SayGames Дзяніс Вайханскі. На той момант паблішар працягваў наймаць супрацоўнікаў у Мінску.

Таксама ў 2022 годзе SayGames перайшла на гібрыдную мадэль манетызацыі. Кампанія запусціла гульні, якія спалучаюць манетызацыю на аснове рэкламы і куплю ў праграме. Такі пераход выявіўся эфектыўным. Прыбытак ад купляў у праграмах вырас на 350% — ад 11 мільёнаў долараў у 2021 годзе да 37,5 мільёнаў долараў у 2022 годзе. 

Пры канцы студзеня 2023 года юрыдычная асоба «Кажыгульні» апынулася ў спісе кампаній з акцыянерамі з недружалюбных краін, якім забаранілі адчужаць долі (акцыі) у беларускіх юрасобах без дазволу Мінфіна (пазней указ пра спісы быў перайначаны).

Галаўны офіс SayGames знаходзіцца на Кіпры. У Мінску доўгі час працавала асноўная каманда. Аднак цяпер на сайце кампаніі няма згадкі пра Беларусь. Кампанія шукае новых супрацоўнікаў у Польшчы (у Варшаве) і на Кіпры (у Лімасоле і Пафасе). 

Асноўная каманда паблішара знаходзіцца ў Польшчы. Польская юрыдычная асоба SayGames была зарэгістраваная вясной 2021 года.

За мінулы год польская юрыдычная асоба атрымала даход сумай 25,6 мільёна злотых (6,4 млн долараў). У параўнанні з 2022 годам даход вырас больш як удвая. Чысты прыбытак геймдэў-кампаніі за мінулы год склаў 0,8 мільёна злотых (0,2 млн долараў), як і ў 2022 годзе. 

Хто яшчэ з вядомых мабільных распрацоўшчыкаў закрыў (закрывае) офіс у Беларусі ў 2024

Playtika

Ізраільская геймдэў-кампанія. Офіс распрацоўкі Playtika ў Мінску быў адкрыты ў 2012 годзе. На піку ў кампаніі працавала больш за 600 чалавек (пры канцы 2021 года). Мінскі офіс уваходзіў у топ-20 найбуйнейшых ІТ-кампаній у Беларусі. У публічных справаздачах кампаніі ад другой паловы 2020 года Беларусь фігуравала ў фактарах рызыкі праз нестабільную палітычную сітуацыю.

Афіцыйна працэдура ліквідацыі кампаніі была запушчаная пры канцы красавіка. Але пра сыход Playtika з Беларусі стала вядома яшчэ ў студзені. Першапачаткова, паводле слоў супрацоўнікаў, планавалася, што беларуская каманда дапрацуе да канца лютага.

Пазней топ-менеджмент кампаніі скарэктаваў планы. Супрацоўнікам паведамілі, што апошні працоўны дзень для ўсіх, хто застанецца ў Беларусі — 30 красавіка.Пасля гэтай даты доступу да карпаратыўных рэсурсаў з Беларусі не будзе.

Belka Games

Адзін з найбуйнейшых мабільных распрацоўшчыкаў з беларускімі каранямі.

У 2019 годзе Belka Games прыцягнула інвестыцыі ад AppLovin, якая на той момант ацэньвалася ў 2 мільярды долараў. У 2021 годзе Belka Games увайшла ў топ-3 найбуйнейшых паблішараў з беларускімі каранямі па памеры выручкі. Кампанія атрымала за год 130,7 мільёна долараў — амаль на 50% больш, чым у 2020 годзе. Таксама Belka Games увайшла ў топ-100 мабільных паблішараў свету па версіі App Annie, у топ-20 па выручцы ў рэгіёне ЕМЕА.

Вайна ва Украіне вымусіла кампанію скарэктаваць стратэгію развіцця. У лістападзе 2022 года Belka Games заявіла аб сыходзе з Расіі і рэлакацыі амаль усёй расійскай каманды ў іншыя краіны. Офіс (прыкладна са ста чалавек) у Беларусі на той момант працягваў працаваць. Але, паводле слоў крыніц, яшчэ ў 2021 годзе кампанія ўвяла мараторый на найманне ў РБ. 

Працэдура ліквідацыі юрыдычнай асобы ў Беларусі была запушчаная пры канцы снежня 2023 года. 

Apalon

Мабільны распрацоўшчык з беларускімі каранямі. Закрыццё кампаніі стала наступствам продажу інтэлектуальнай уласнасці прадуктаў Mosaic Group (мацярынскай кампаніі Apalon) італьянскай кампаніі Bending Spoons.  У Apalon працавала каля 150 чалавек, з іх больш за 100 — у мінскім офісе.

Два десятка мобильных разработчиков отключили монетизацию Unity в играх в знак протеста — среди них Say Games и Playgendary

По теме

Два десятка мобильных разработчиков отключили монетизацию Unity в играх в знак протеста — среди них Say Games и Playgendary

«Нечакана скончыліся грошы». Экс-супрацоўнік Teslasuit пра закрыццё мінскага офіса

Па тэме

«Нечакана скончыліся грошы». Экс-супрацоўнік Teslasuit пра закрыццё мінскага офіса

Apalon ликвидирует юрлицо в Беларуси

По теме

Apalon ликвидирует юрлицо в Беларуси

Кампанію ў Мінску закрывае яшчэ адзін вядомы мабільны распрацоўшчык

Па тэме

Кампанію ў Мінску закрывае яшчэ адзін вядомы мабільны распрацоўшчык

Playtika афіцыйна ліквідуе бізнэс у Беларусі

Па тэме

Playtika афіцыйна ліквідуе бізнэс у Беларусі