Дзяржпагранкамітэт заявіў аб збіцці мігранта латвійскімі сілавікамі

25 сакавіка, Позірк. Беларускія памежнікі 23 сакавіка знайшлі “збітага мужчыну афрыканскай знешнасці” каля брамкі для жывёл на мяжы з Латвіяй, паведамляе Дзяржаўны памежны камітэт.

Як сцвярджае ДПК, замежнік распавёў, што “людзі ў ваеннай форме на латвійскай тэрыторыі яго збілі”.

“У бежанца была пашкоджана нага, а на целе множныя гематомы. Ён не мог самастойна перасоўвацца”, — гаворыцца ў рэлізе.

Выкліканыя медыкі даставілі яго ў Браслаўскую цэнтральную раённую бальніцу (Віцебская вобласць).

“Здзекі, збіццё і іншыя факты бесчалавечнага стаўлення еўрапейскіх сілавікоў да безабаронных уцекачоў з 2021 года прывялі да гібелі 47 замежнікаў: на мяжы з Польшчай — 23, з Латвіяй і Літвой — 15 і 9 адпаведна”, — сцвярджае Дзяржпагранкамітэт.

Паводле даных Следчага камітэта, замежнікам аказаўся 26-гадовы грамадзянін Конга: “Яму наносілі ўдары рукамі і нагамі, а таксама выкарыстоўвалі электрашокер. Замест дапамогі, ежы і вады, прадстаўнікі латвійскага боку адвезлі замежніка на мяжу. Там узброеныя найміты разбілі яго мабільны тэлефон і, адчыніўшы брамку, выштурхалі на тэрыторыю Беларусі”.

З пачатку года Латвія папярэдзіла 643 спробы нелегальнага перасячэння мяжы. З пачатку сакавіка ў гэтую балтыйскую дзяржаву спрабавала трапіць больш нелегалаў, чым за ўвесь сакавік мінулага года (563 супраць 559).

Колькасць мігрантаў, якія спрабавалі нелегальна перасячы мяжу Латвіі з пачатку сакавіка ў 7 разоў перавышае сумарны паказчык студзеня і лютага. У 2023 годзе было папярэджана 13.863 спробы незаконнага перасячэння латвійскай мяжы з боку Беларусі, у 2022-м — 5.026.

Міграцыйны крызіс на граніцы Беларусі і краін ЕС прадаўжаецца з вясны 2021 года.