Беларусь скасавала пагадненне з Украінай пра узаемнае прызнанне дакументаў аб адукацыі і навуковых званнях

18 кастрычніка, Позірк. Дзеянне пагаднення з урадам Украіны пра ўзаемнае прызнанне і эквівалентнасць дакументаў аб адукацыі і навуковых званнях спыненае пастановай Савета міністраў Беларусі № 689 ад 17 кастрычніка.

Дакумент, апублікаваны на Нацыянальным прававым інтэрнэт-партале 18 кастрычніка, загадвае Міністэрству замежных спраў паведаміць украінскаму боку пра прынятае рашэнне.

Згаданае пагадненне было падпісана 6 лютага 1998 года ў Мінску. У адпаведнасці з ім дакументы дзяржузору аб сярэдняй і прафесійна-тэхнічнай адукацыі, выдадзеныя ў Беларусі і Украіне, прызнаваліся раўназначнымі і дазвалялі працягваць навучанне на наступным узроўні ў любой з гэтых краін.

Пры прыёме на працу не рабілася розніцы паміж дыпломамі і атэстатамі аб заканчэнні прафесійна-тэхнічных (у Беларусі) і прафесійных (ва Украіне) устаноў адукацыі, дыпломамі аб заканчэнні беларускіх спецыяльных навучальных устаноў і сертыфікатамі малодшых спецыялістаў, выдадзеных украінскімі ВНУ.

Эквівалентнымі прызнаваліся дыпломы ВНУ Беларусі і Украіны, атэстаты аб прысваенні навуковага звання дацэнта, прафесара.

Украіна нівеліявала дзеянне гэтага пагаднення і шэрагу іншых дакументаў у галіне адукацыі і навукі яшчэ летась 9 красавіка.

У кастрычніку 2022 года Беларусь скасавала падобнае пагадненне з урадам Польшчы — аб прызнанні эквівалентнасці вышэйшай адукацыі, раўназначнасці навуковых ступеняў і ступеняў у галіне мастацтва.